अरुणाचल प्रदेशको तवाङ क्षेत्रमा लगभग ३०० चिनियाँ सैनिकहरूले आक्रमण गरेपछि भारत र चीनबीचको तनाव बढेको छ । 

विगत केही दिनयता चीनका ड्रोनहरू मकमाहोन सीमारेखा नजिक भारतीय क्षेत्रमा आउने कोशिश गरिरहेका थिए । त्यसपछि भारतले आफ्नो सुखोई–३० लडाकू विमान त्यता पठाएको थियो । 

डिसेम्बर १५ मा भारतीय सेनाले अरुणाचल प्रदेशमा ठूलो अभ्यास गर्न लागेको थियो । त्यसलाई विचार गर्दै चिनियाँ सेना तवाङमा प्रवेश गर्न खोजेको हो । 

ओपन सोर्स इन्टेलिजेन्स चलाउने डेमियन साइमनले १५ र १६ डिसेम्बरमा भारतीय वायुसेनाले पूर्वोत्तर सहित अनेकौं इलाकामा व्यापक अभ्यासका लागि सूचना जारी गरिसकेको जानकारी दिएका छन् । 

चीनबाट हवाई खतरा हुन सक्ने भएकाले भारतले पूर्वोत्तरभरि सुखोई एमकेआई लडाकू विमान तैनाथ गरेको छ । त्यसका साथै पश्चिम बंगालमा भारतको घातक राफेल लडाकू विमानहरू पनि तैनाथ छन् । यी दुवैथरी लडाकू विमानमार्फत पूर्वोत्तरमा शक्तिप्रदर्शन गर्ने भारतको दाउ थियो ।