चीनले ताइवानतर्फ विगत २४ घन्टामा १८ वटा बमवर्षक विमान पठाएको ताइवानको रक्षा मन्त्रालयले मंगलवार जानकारी दिएको छ । 

ती बमवर्षक विमानसँग आणविक हतियार समेत प्रहार गर्ने क्षमता रहेको बताइएको छ । 

चीनले त्यसबाहेक तीन थप लडाकू विमान पनि ताइवानको हवाईक्षेत्रमा पठाएको बताइएको छ । 

मंगलवार ताइवानको एयर डिफेन्स आइडेन्टिफिकेसन जोनमा यति धेरै विमान एकैपटकमा चीनले नपठाएको लामै समय भइसकेको थियो । 

विशेषगरी अमेरिकी संसद्की तत्कालीन सभामुख न्यान्सी पलोसीको उत्तेजनात्मक भ्रमणपछि चीनले आक्रामक सैन्य अभ्यास गरेपछिको यो पहिलो महत्त्वपूर्ण घटनाक्रम हो । 

एच–६ चीनको लामो दूरीसम्म आक्रमण गर्ने प्रमुख बमवर्षक विमान हो । 

ताइवानका परराष्ट्रमन्त्री जोसेफ वूले द गार्डियन पत्रिकालाई दिएको अन्तर्वार्तामा ताइवानमा घुसपैठ गर्न चीन तम्तयार रहेको बताएका छन् ।