नेकपा (एकीकृत समाजवादी) पार्टीको संसदीय दलको बैठक आज सोमबार बस्दैछ । पार्टी मुख्यालयमा दिउँसो १ बजे बैठक बस्न लागेको सो दलका महासचिव डा. वेदुराम भुषालले जानकारी दिए । 

सो दलको आइतबार सचिवालय बैठक बसेको थियो । सोही बैठकले संसदीय दलको बैठक बोलाउने निर्णय गरेको थियो । दलको बैठकले संंसदीय दलको नेता चयन गर्ने र आगामी सरकार गठनमा दलको तर्फबाट खेलिने भूमिका बारेमा निर्णय लिने सो दलले जनाएको छ ।

संसदीय दलको नेतामा अध्यक्ष माधवकुमार नेपाल सर्वसम्मत चयन हुने करिब पक्का रहेको बैठकमा समसामयिक राजनीतिक विषयमा पनि छलफल हुने महासचिव भुषालले बताए । नेकपा (एस) राष्ट्रिय दल बन्न नसके पनि प्रत्यक्ष निर्वाचित १० सांसद यो दलसँग रहेका छन् । राष्टपति विद्यादेवी भण्डारीले सात दिनको समय दिएर आइतबार सरकार गठनको आव्हान गरेपछि सबै दलको बैठक नियमित बस्न थालेको छ ।