कीर्तिमानी आरोही सानु शेर्पालाई संस्कृति, पर्यटन तथा नागरिक उड्डयन मन्त्रालयले सम्मान गरेको छ । आरोही शेर्पालाई संस्कृति, पर्यटन तथा नागरिक उड्डयनमन्त्री जीवनराम श्रेष्ठले बुधवार मन्त्रालयमा बोलाएर सम्मान गरे । 

एक महिनाको मन्त्रीको तलव सम्मानस्वरुप ७० हजार ७ सय ३० रुपियाँ बराबरको चेक पनि मन्त्री श्रेष्ठले हस्तान्तरण गरे । सम्मान कार्यक्रममा पर्यटनमन्त्री श्रेष्ठले हिमाल आरोहण गर्नेकुरा कम चुनौतीको विषय नभएको बताए । आरोही शेर्पाले ८ हजार मिटरभन्दा अग्ला १४ वटा हिमाल दुई दुई पटक आरोहण गरेर विश्व कीर्तिमानी कायम गरेका छन् । सो उपलक्ष्यमा आफूले उनको सम्मानस्वरुप एक महिनाको तलव हस्तान्तरण गरेको उनले बताए । 

मन्त्री श्रेष्ठले सगरमाथा आरोहण गर्ने व्यक्तिलाई अन्य देशमा  देशको गौरवको रुपमा सम्मान दिने गरिए पनि नेपालमा त्यत्ति चासो दिन नसकेको बताए । आरोही शेर्पाले अहिलेसम्म ७ पटक विश्वको सर्वोच्च शिखर सगरमाथाको सफल आरोहण गरेका छन् । 

मन्त्री श्रेष्ठले कीर्तिमानी आरोही सानु शेर्पासहितका हिमाल आरोहीहरुको चर्चा विश्वमा गर्नसके पर्यटन क्षेत्रको प्रचारका साथै नेपालको छवि पनि विश्वमाझ पुग्ने बताए ।  सो अवसरमा कीर्तिमानी शेर्पाले सम्मानले आफूलाई थप हौसला बढेको बताए ।