नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले सरकारको नेतृत्वबारे कांग्रेस सभापति शेरबहादुर देउवासँग निर्णायक कुरा गर्ने बताएका छन् । पार्टी केन्द्रीय कार्यायल पेरिसडाँडामा बिहीवार बसेको पदाधिकारी बैठकमा प्रचण्डले पहिलो कार्यकालको प्रधामन्त्रीमा दाबी रहने बताएका हुन् । 

‘सरकार गठनका लागि छलफल चलिरहेको छ, कुरा सकारात्मक नै छ । संसदीय दलको नेता चयनपछि आजै (बिहीवार साँझ) देउवाजीसँग कुरा गर्दैछु’, प्रचण्डको भनाइ उदृत गर्दै माओवादीका एक सचिवले लोकान्तरसँग भने, ‘सकेसम्म माधवजी र मसँगै कुरा गर्न जान्छौँ ।’ प्रचण्डले एमालेसँग मिलेर सरकार गठनको सम्भावनाबारे भने केही बताएका थिएनन् । 

कांग्रेस संसदीय दलमा रामचन्द्र पौडेलले देउवालाई प्रस्ताव गर्नुले गठबन्धनमा सत्ता साझेदारीमा सहज संकेत देखिएको प्रचण्डले बताएका थिए । ‘रामचन्द्रजीले देउवालाई प्रस्ताव गर्नुको अर्थ छ, गठबन्धनमा सहमतिको संकेत हो’, प्रचण्डले भनेका थिए । 

बिहीवार संसद् परिसरमा पत्रकारसँग कुरा गर्दै कांग्रेस नेता पौडेलले राष्ट्रपति बन्ने सम्भावना इन्कार गरेका थिएनन् । राष्ट्रपति बन्दै हुनुहुन्छ रे नि भन्ने पत्रकारको प्रश्नमा पौडेलले भनेका थिए, ‘त्यही बेला थाहा हुन्छ !’ पौडेलले भनेका थिए ।

देउवाले पनि संसदीय दलको निर्वाचनपछि ‘पावर शेयरिङ’बारे छलफल गर्ने बताएका थिए । देउवा बुधवार संसदीय दलको नेता चयन भएका छन् । प्रचण्ड पनि बिहीवार संसदीय दलको नेता चयन भइसकेका छन् । 

प्रधानमन्त्री सिफारिस गर्न राष्ट्रपति विद्यादेवी भण्डारीले दिएको समय पुस १० गते आइतवार सकिँदैछ । बुधवार राष्ट्रपति कार्यालय र बिहीवार संसद् भवन परिसरमा ओली र प्रचण्डबीच भलाकुसारी भएको थियो । 

बिहीवार ओलीले प्रचण्डलाई प्रधानमन्त्रीका लागि तयारी गर्न आग्रह गरेका थिए ।