नेपाली कांग्रेस कर्णाली प्रदेशसभा संसदीय दलको नेतामा जीवनबहादुर शाही निर्विरोध चयन भएका छन् ।

प्रदेशसभा सदस्य राजीवविक्रम शाहको प्रस्ताव र जानकी सिंहको सर्मथनमा मुख्यमन्त्री समेत रहेका शाही शुक्रवार निर्विरोध नेता चयन भएका हुन् ।

उनी मंसिर ४ गते सम्पन्न निर्वाचनमा हुम्ला प्रदेशसभा क्षेत्र (२) बाट निर्वाचित भएका थिए ।  

शाही कांग्रेस केन्द्रीय कार्यसम्पादन समितिका सदस्य हुन् । दलको नेता चयनसँगै शाहीलाई मुख्यमन्त्रीमा दाबी गर्न बाटो खुलेको छ । निर्वाचन समितिले चुनावी प्रक्रिया शुरू गरेसँगै उनको एकल उम्मेदवारी परेको थियो । यसअघि सामाजिक सञ्जालमार्फत दलको नेतामा उम्मेदवारी घोषणा गरेका शाह नै शाहीको प्रस्तावक बसेका थिए ।

निर्वाचन समितिका संयोजक कृष्णबहादुर रोकायले दलको विधान २०७४ को धारा ५ बमोजिम एकल उम्मेदवारी परेपछि शाही निर्विरोध निर्वाचित भएको जानकारी दिए ।

दलको नेतामा सर्वसम्मत भएलगत्तै शाहीले सबैलाई मिलाएर लैजाने र सरकार गठनका सम्बन्धमा गठबन्धन दलसँग छलफल शुरू गर्ने प्रतिक्रिया दिए ।