०५ साउन २०८३, मंगलबार
चीनमा कोरोना संक्रमणका कारण ठूलो संख्यामा मानिसहरूको मृत्यु हुन थालेपछि शवदाह गृहहरूलाई लाश जलाउन भ्याइनभ्याइ हुन थालेको बेलायती पत्रिका द डेली मेलले खबर दिएको छ ।
चीन सरकारले शून्य कोभिड नीति त्यागेर लकडाउन खुकुलो बनाएपछि संक्रमण र मृत्युसंख्या बढिरहेको हो । तर अधिकारीहरू लकडाउन खोलेपछि जम्मा सातजनाको मृत्यु भएको बताउँछन् ।
अहिले चीनका विभिन्न शहर र गाउँका अस्पतालको आकस्मिक कक्षहरू भरिभराउ भएर रोगी राख्ने ठाउँ समेत सकिएको बताइएको छ ।
सरकारले जम्मा सातजनाको मृत्यु भएको भने पनि चिनियाँहरूले पत्याएका छैनन् । शवदाह गृहका एक सञ्चालकले पत्रकारहरूलाई अत्यन्तै धेरै लाशहरू आइरहेको बताए । दिनरात काम गर्दा पनि सबै लाश जलाउन नसकिएको उनको भनाइ छ ।
मंगलवार एक चिनियाँ स्वास्थ्य अधिकारीले बताएअनुसार, सरकारले कोभिडबाट भएको मृत्युमा निमोनिया वा श्वासप्रश्वास बन्द भएको स्थितिलाई मात्र गणना गर्ने गरेको छ ।
विज्ञहरूले चीनमा सन् २०२३ मा १० लाखदेखि २० लाख मृत्यु हुने आकलन गरेका छन् । विश्व स्वास्थ्य संगठनले वास्तविक मृत्युसंख्यालाई घटाएर प्रस्तुत नगर्न चीनलाई चेतावनी दिएको छ ।
