२५ जेठ २०८३, सोमबार
भारतको गुजरात राज्यमा रहेको वडोदरामा सान्टा क्लसको भेषभूषा धरेका एक युवकमाथि कुटपिट भएको छ ।
केही युवकहरूले उनलाई कुटपिट गर्दा उनी गम्भीर रूपमा घाइते भएका छन् ।
मकरपुराको अवधूत सोसाइटीमा क्रिसमसअघि सान्टा क्लसको भेषभूषा बनाएर एक पुरुष र एक महिला पुगेका थिए ।
आफूहरूको क्षेत्रमा किन आएको भन्दै उनीमाथि आक्रमण गरिएको थियो ।
पिटाइ खाने व्यक्तिको हातमा गम्भीर चोट लागेको छ । उनलाई उपचारका लागि एक निजी अस्पतालमा भर्ना गरिएको छ ।
अज्ञात आक्रमणकारीहरूका विरुद्ध उजुरी दर्ता गरिएको छ ।
सान्टा क्लसको वस्त्र लगाउने व्यक्तिको नाम शशिकान्त डाभी हो । उनी एक ईसाई परिवारको घरमा क्रिसमसको शुभकामना दिन पुगेका थिए ।
ईसाई परिवारले खुशियाली मनाउँदै गर्दा केही मानिस पसेर शशीकान्तमाथि कुटपिट गरेको बताइएको छ ।
हिन्दू इलाकामा यसरी क्रिस्चियन पर्व मनाउन नहुने भनी उनीहरूले कुटपिट गरेको पीडितहरूले बताए । आक्रमणकारीहरूले केही मानिसको कपडा पनि च्यातिदिएका थिए ।
प्रहरीले घटनाको अनुसन्धान गरिरहेको छ ।
