नेपाली कांग्रेसका नेता एवं सञ्चार तथा सूचना प्रविधिमन्त्री ज्ञानेन्द्रबहादुर कार्कीले प्रधानमन्त्री एवं कांग्रेस सभापति शेरबहादुर देउवा गठबन्धन जोडाउने छलफलमा रहेको बताएका छन् । 

उनले आजै गठबन्धनको बैठक बस्ने र एउटा निष्कर्षमा पुगिने बताए । प्रधानमन्त्री निवास बालुवाटारमा बसेको गठबन्धनको बैठकपछि पत्रकारलाई प्रतिक्रिया दिँदै कार्कीले भने, ‘५ बजेसम्मको समयसीमा बारे हामीलाई थाहा छ । सबै कुरा अन्तिम घडीमा हुन्छ ।’ 

कार्कीले गठबन्धन टिकिराख्ने दाबी गरे । ‘गठबन्धन मुलुकको आवश्यकता हो, जनताले अनुमोदन गरेका छन्’, उनले भने । भारतीय सञ्चारकर्मीले हिन्दी भाषामा सोधिएको एक प्रश्नमा मन्त्री कार्कीले पहिलो कार्यकालको प्रधानमन्त्री रहने प्रचण्डको आकांक्षा रहेको बताए ।

बालुवाटार बैठक छाडेर माओवादी अध्यक्ष पुष्पकमल दाहाल ‘प्रचण्ड’, नेकपा एकीकृत समाजवादीका अध्यक्ष माधवकुमार नेपाल र सम्मानित नेता झलनाथ खनाल पनि बाहिरिएका छन् ।