०९ साउन २०८३, शनिबार
भारतीय जनता पार्टीले पूर्व केन्द्रीय मन्त्री सलमान खुर्शीदको एक अभिव्यक्तिमा आपत्ति जनाएको छ ।
खुर्शीदले कांग्रेस नेता राहुल गान्धीको तुलना भगवान् रामसँग गरेपछि भाजपाले मंगलवार आपत्ति जनाएको हो ।
सोमवार मुरादाबादमा खुर्शीदले कांग्रेसको भारत जोडो यात्रा उत्तर प्रदेश नपुगेको विषयमा प्रश्नमा उत्तर दिने क्रममा राहुलको तुलना भगावन् रामसँग गरेका हुन् ।
भाजपा प्रवक्ता गौरव भाटियाले पत्रकार सम्मेलन आयोजना गर्दै यस तुलनाबाट हिन्दू समाज मात्र नभई पूरा भारतकै भावना आहत भएको बताए । यस्तो दुस्साहसको जवाफ जनताले दिने उनको भनाइ छ ।
खुर्शीदले राहुललाई अतिमानव र योगी जस्ता शब्दले समेत प्रशंसा गरेका थिए । जाडो याममा सबैजना ज्याकेट लगाएर पनि काँपिरहेको बेलामा राहुल टीशर्टमा निस्केकोमा खुर्शीदले प्रशंसाको पुष्पगुच्छा चढाएका हुन् ।
त्यसक्रममा खुर्शीदले भने, ‘भगवान् रामको खराउ टाढासम्म पुग्छ । भरतले उहाँको खराउ टाउकोमा राखेर हिँड्नुभएको थियो । त्यसैगरी हामी खराउ लिएर उत्तर प्रदेश गएका छौं । रामजी पनि पुग्नुहुनेछ । यो हाम्रो विश्वास हो ।’
भाजपा प्रवक्ताले खुर्शीदको बयानलाई चाटुकारिताको पराकाष्ठा भनेका छन् । उनले थपे, ‘हामी सबैका आराध्यदेव भगवान् श्रीरामको तुलना भ्रष्टाचारको आरोपमा धरौटीमा रिहा भएको व्यक्तिसँग गर्नुले कांग्रेस नेताहरू चाटुकारिताबाहेक केही गर्दैनन् भन्ने कुरा प्रमाणित गरेको छ ।’
