आफ्नो कार्य क्षेत्रभित्र भएका कुकुर र बिरालालाई खोप लगाउन तथा बन्ध्याकरण गर्न काठमाडौं महानगरपालिकाले इच्छुक संघ संस्थालाई आह्वान गरेको छ । बुधबार सार्वजनिक सूचना जारी गर्दै आर्थिक वर्ष २०७९÷०८० का लागि काम गर्न इच्छुक संघ संस्थालाई ७ दिनभित्र खाद्य गुणस्तर नियमन तथा पशुपंक्षी महाशाखामा सम्पर्क राख्न अनुरोध गरेको हो । 

बन्ध्याकरण र खोप भ्याक्सिनको दर २ हजार ५ सय रुपैयाँ प्रति गोटा र खोप भ्याक्सिनको मात्र २ सय रुपैयाँ प्रति गोटा रहेको सूचनामा उल्लेख गरिएको छ । इच्छुकले सेल्टर र बन्ध्याकरण गर्ने कक्ष भएको प्रमाण कागज तथा सम्झौता भए त्यसको प्रतिलिपि, साधन तथा उपकरणको विवरण, संघ संस्था दर्ता तथा नवीकरण भएको प्रमाण पत्र, विधानको प्रतिलिपि, काठमाडौं महानगरपालिकाको मौजुदा सूचीमा सूचीकृत भएको पत्र, संस्थाले अहिलेसम्म कुकुर र बिरालोको भाले पोथी दुवैको बन्ध्याकरण गरेको संख्यालगायत विवरण र कार्य योजनासहितको प्रस्ताव बुझाउनु पर्नेछ । यस्तै संस्थामा अनुभवी पशु चिकित्सक भएको प्रमाण पत्र, पशु ओसार पसार गर्न प्रयोग हुने सवारी साधनको ब्लुबुक र भाडामा भएको भए सम्झौताको प्रतिलिपि, कुकुर बिरालो समात्ने जनशक्ति तथा बन्ध्याकरण गर्ने जनशक्तिको अनुभव पेश गर्नुपर्छ । यस्तै संस्थाले यस बन्ध्याकरण तथा खोप कार्यका लागि कति योगदान गर्न सक्छ, यस सम्बन्धी प्रतिबद्धता प्रस्तावका साथमा पेश गर्नुपर्नेछ ।  

यसअघि ह््युमन सोसाइटी इन्टरनेशनल र द जेन गुडल इन्ष्टिच्युटको सहकार्यमा मनुमित्र कार्यक्रम सञ्चालन भइरहेको छ । अहिले सामुदायिक कुकुरहरू खाना नपाएर कुपोषित भएका, छालाजन्य रोगले ग्रस्त भएका, दुर्घटनाबाट अङ्गभङ्ग भएका जस्ता समस्यामा छन् । उनीहरू बेलाबेलामा मानिस र सवारी साधनप्रति आक्रामक बन्दा मानिसहरूमा पनि समस्या छ । कुकुरको टोकाइ पछि रेबिज विरुद्धको खोप लगाउन जानु पर्ने अवस्थाले अस्पतालहरूमा चाप बढ्ने गरेको छ ।