प्रधानमन्त्री पुष्पकमल दाहाल ‘प्रचण्ड’ नेतृत्वको सरकारलाई समर्थन गरेको राप्रपा सरकारमा सहभागी हुन राजी भएको छ । सरकारका न्यूनतम साझा कार्यक्रममा आफूहरूका एजेण्डा समेटिए सरकारमा सहभागी हुने राप्रपाले बताएको छ । 

प्रधानमन्त्री निवास बालुवाटारमा बिहीवार बसेको सत्तारुढ चारदलको बैठकमा अध्यक्ष राजेन्द्र लिङदेनले सरकारमा सहभागी हुन केही शर्त राखेका थिए । राप्रपाले पुस २७ गतेलाई पृथ्वी जयन्ती एवं राष्ट्रिय एकता दिवसको रुपमा मनाउँदै सार्वजनिक बिदा दिनुपर्नेलगायत शर्त राखेको छ । 

बालुवाटार बैठकपछि उपप्रधान एवं गृहमन्त्री रवि लामिछानेले सरकारमा सहभागिताका लागि राप्रपा लचिलो रहेको जानकारी दिए । ‘यो गठबन्धन उद्धेश्य प्राप्तिका लागि बनेको हो, सरकारका न्यूनतम साझा कार्यक्रम तयार भएपछि राप्रपा पनि सरकारमा सहभागी हुन लचिलो हुने संकेत अध्यक्षज्यूले गर्नुभएको छ’ लामिछानेले भने । 

प्रतिपक्षमा बसेर गुण दोषका आधारमा सरकारको समर्थन या विरोध गर्ने नीति लिएको राप्रपाले पछिल्लो बैठकमार्फत सरकारमा सहभागी हुने निर्णय गरेको थियो । राप्रपाको शर्तअनुसार पृथ्वीनारायण शाहको जन्मजयन्तिमा सार्वजनिक बिदा दिन प्रधानमन्त्री ‘प्रचण्ड’ सकारात्मक देखिएका छन् ।