१२ साउन २०८३, मंगलबार
अफ्रिकी मुलुक बुर्किना फासोले फ्रान्सेली राजदूतलाई देश छोडेर जान निर्देशन दिएको छ ।
सन्् २०२२ को नोभेम्बर महिनामा भएको अशान्तिपछि यो कदम चालिएको हो । त्यतिखेर प्रदर्शनकारीहरूले फ्रान्सेली दूतावासमा आक्रमणको कोशिश गरेका थिए । उनीहरूले देशको सुरक्षा समस्याको कारण फ्रान्स भएको आरोप लगाएका थिए ।
एपी समाचार संस्थासँग कुरा गर्दै सरकारका प्रवक्ता जँ–इम्मानुएल उएड्राओगोले राजदूत लुक हाल्लादेलाई निष्काशन गरिएको जानकारी दिए । तर उनले यसको थप विवरण दिएनन् ।
फ्रान्सेली पत्रिका ल मोँदका अनुसार, बुर्किना फासोको परराष्ट्र मन्त्रालयले पेरिसलाई पत्र पठाएर राजदूत परिवर्तन गर्न अनुरोध गरेको छ ।
हाल्लादेले बुर्किना फासोको शहर कोउदोउगोउमा रहेका फ्रान्सेली नागरिकलाई पत्र लेखेको विषयलाई पनि राजदूत निष्काशनको एक कारण बताइएको छ । उक्त पत्र पछि लीक भएको थियो ।
त्यतिखेर राजदूत हाल्लेदेले फ्रान्सेलीहरूलाई औआगादोउगोउमा राजधानी सार्न भनेका थिए । जिहादीहरूको जोखिम बढेकाले त्यसो गर्न उनले भनेका थिए ।
बुर्किना फासोमा जनवरी २०२२ यता नै दुईपटक कू भइसकेको छ ।
विगत कैयौं महिनादेखि त्यस देशमा फ्रान्सविरोधी भावना चर्किरहेको छ । नोभेम्बर महिनामा प्रदर्शनकारीहरूले औआगादोउगोउमा रहेको फ्रान्सेली दूतावासमा पुगेर राजदूत निष्काशनको माग गरेका थिए ।
उक्त देशमा सैनय उपस्थिति राखेको फ्रान्सले आतंकवादलाई हराउन सफलता नपाएको भन्दै कतिपय अभियन्ताहरूले विरोध गरिरहेका छन् । उनीहरू फ्रान्ससँगको सुरक्षा सम्बन्ध तोडेर रुससँग थप निकट सम्बन्ध कायम गर्न चाहन्छन् ।
