२८ जेठ २०८३, बिहीबार
प्रधानमन्त्री कप राष्ट्रिय महिला क्रिकेट प्रतियोगिताको सुदूरपश्चिम प्रदेशस्तरीय छनोटअन्तर्गत बैतडीले लगातार दोस्रो जीत दर्ता गरेको छ ।
बुधवार बैतडीले डोटीलाई ७७ रनले हरायो । यसअघि मंगलवार बैतडीले अछामलाई ९० रनले पराजित गरेको थियो ।
बैतडीले दिएको १४२ रनको लक्ष्य पछ्याएको डोटी १९ दशमलव १ ओभरमा ६४ रनमा अलआउट भयो । डोटीका लागि हिसिला खड्काले १६ र दिवेश्वरी ठकुल्लाले १० रन बनाउनुबाहेक अन्यले दोहोरो अंकको रन बनाउन सकेनन् ।
बैतडीकी करिश्मा थापाले ३ र कप्तान रितु कनौजियाले २ विकेट हात पारे ।
त्यसअघि फाप्ला मैदानमा पहिला ब्याटिङ गरेको बैतडीले १९ दशमलव २ ओभरमा १४१ रनमा समेटिएको थियो । जसमा कप्तान रितु कनौजियाले २४ र संगीता मौनीले अविजित १८ रन बनाइन् ।
डोटीकी दिवेश्वरी ठकुल्लाले ४ र हिसिला खड्काले २ विकेट हात पारिन् ।
प्रतियोगितामा सहभागी ७ टोलीमध्ये शीर्ष २ जनामा पुग्ने टोलीबीच पुस २३ गते फाइनल भिडन्त हुने सुदूरपश्चिम प्रादेशिक क्रिकेट संघका सचिव तेजप्रकाश भट्टले जानकारी दिए । प्रदेशस्तरीय छनोट प्रतियोगिताबाट सुदूरपश्चिम प्रदेशको टोली बनाइनेछ ।
टोलीले प्रधानमन्त्री कप महिला राष्ट्रिय क्रिकेट प्रतियोगितामा सहभागिता जनाउनेछ । नेपाल क्रिकेट संघको आयोजनामा प्रधानमन्त्री कप राष्ट्रिय क्रिकेट प्रतियोगिता पुस २९ गतेदेखि इटहरीमा हुँदैछ ।
