२९ जेठ २०८३, शुक्रबार
प्रदेश १ को उपसभामुखमा नेपाली कांग्रेसले पनि उम्मेदवारी दिएको छ ।
सत्ता गठबन्धनका तर्फबाट नेकपा एमालेकी सिर्जना दनुवारले उम्मेदवारी दर्ता गराएकी छन् भने प्रमुख प्रतिपक्षी दल कांग्रेसबाट लीला राईको उम्मेदवारी परेको हो।
दुवै उदयपुरका हुन् । समानुपातिक तर्फबाट उनीहरूले प्रदेशसभामा प्रतिनिधित्व गरेका थिए । सभामुखमा भने कांग्रेसले उम्मेदवारी दिएको थिएन । प्रदेश सभा सचिवालयले बिहीबार उपसभामुखको निर्वाचनको लागि कार्यपालिका सार्वजनिक गरेको थियो।
निर्वाचनको मिति पुस ३० गते ११ बजेका लागि तोकिएको छ । दलीय भागबण्डामा सत्तारूढ दलमध्ये प्रदेश १ को उपसभामुख एमालेको भागमा परेको छ।
सत्ता गठबन्धनमा एमालेका ४०, माओवादी केन्द्रका १३, राप्रपाका ५ र जसपाका १ सिट छ। माओवादीका बाबुराम गौतम सभामुख भएकाले सत्ता गठबन्धनमा ५९ मत हुन्छ भने विपक्षी दलहरूमा कांग्रेसको २९ र नेकपा (एकीकृत समाजवादी) का ४ गरी ३३ सांसद छन् ।
बहुमतका लागि ४७ सांसद आवश्यक पर्छन्। प्रदेशशभमा ९२ सांसद छन् ।
केन्द्रीय गठबन्धनमा भएको सहमतिअनुसार एमालेले मुख्यमन्त्री र उपसभामुख पाउँछ भने माओवादीले सभामुख पाइसकेको छ । सभामुख र उपसभामुख चयन गर्दा दुईमध्ये एक जना महिला हुनुपर्ने संवैधानिक व्यवस्था छ।
