आज सोमबार बोलाइएको सुदूरपश्चिम प्रदेश सभाको बैठक मंगलबारसम्मका लागि स्थगित भएको छ । आज सरकारले राष्ट्रिय शोक मनाउन सार्वजनिक विदा दिएकाले बैठक भोलिसम्मका लागि स्थगित गरिएको प्रदेश सभा सचिवालयले जनाएको छ । बैठक भोलि बिहान १० बजे बस्नेछ । 

राष्ट्रिय झण्डा झुकाउने भनेको बेला बैठक बस्नु हुन्न भन्ने सहमति भएको माओवादीका प्रदेश सभा सदस्य ओमविक्रम भाटले जानकारी दिए । प्रदेश सभाका अर्का सदस्य नरेशकुमार शाहीका अनुसार माघ ३ गते मंगलबार बिहान १० बजे बैठक बस्ने गरी स्थगित गरिएको छ । आज बस्ने भनिएको बैठकबारे दलका नेताहरुबीच भएको छलफलपछि भोलिका लागि सारिएको हो । 

लगातार दुई पटक सभामुख छानिन नसकेपछि आज तेस्रो पटक सभामुख छान्नका लागि प्रदेश सभाको बैठक बोलाइएको थियो ।