१० साउन २०८३, आइतबार
२०७९ को प्रतिनिधिसभा निर्वाचनमा प्रदेश १ कै सबैभन्दा रोचक चुनावी प्रतिस्पर्धा भएको थियो, भोजपुरमा ।
प्रतिनिधिसभामा प्रदेश १ का पहिलो मुख्यमन्त्री शेरधन राई र बहालवाला सांसद सुदन किराँती प्रतिस्पर्धी थिए भने प्रदेशसभामा बहालवाला मुख्यमन्त्री राजेन्द्र राई पनि चुनावी मैदानमा भएकाले रोचक बनेको थियो ।
शेरधनले भोजपुरलाई एक थान सांसद नभई मन्त्री चाहिएको भन्दै भोट माग्ने गरेका थिए । सुदनले जनताको काम गर्ने प्रतिनिधि चाहिन्छ, गफ गर्ने व्यक्ति चाहिँदैन भन्थे ।
निर्वाचनको समयमा भोजपुरको चुनावी सभालाई सम्बोधन गर्न पुगेका नेकपा (माओवादी केन्द्र)का अध्यक्ष तथा हालका प्रधानमन्त्री प्रचण्डले सुदन किराँतीलाई मन्त्री बनाउने प्रतिबद्धता व्यक्त गरेका थिए ।
त्यही सभास्थलनजिकै बम विस्फोट समेत भएको थियो । एमालेविरुद्धकै प्रतिस्पर्धामा चुनाव जितेका सुदन एमालेसहितकै सरकारमा मन्त्री बनेका छन् ।
उनले शेरधनलाई २ हजार ३८५ मतले पराजित गरेका थिए । किराँतीले २८ हजार ५७८ मत प्राप्त गर्दा शेरधनले २६ हजार १९३ मत प्राप्त गरेका थिए ।
किराँती २०६४ साल र २०७४ सालमा पनि निर्वाचित भएका थिए । उनै किराँतीलाई राईले ०७० सालको संविधानसभा निर्वाचनमा भने पराजित गरेका थिए ।
किराँतीले मंगलवार पर्यटन तथा नागरिक उड्डयन मन्त्रीको रूपमा जिम्मेवारी सम्हालेका छन् ।
