०३ साउन २०८३, आइतबार
अमेरिकाको रक्षा मन्त्रालय पेन्टागनका अधिकारीहरूले युक्रेनलाई एफ–१६ लडाकू विमान पठाउन चाहेका छन् ।
जर्मनी र अमेरिकाबाट ट्यांक प्राप्त गरेपछि युक्रेनका राष्ट्रपति भोलोदीमीर जेलेन्स्कीले अब लडाकू विमान र लामो दूरीको हतियार माग्न थालेका छन् ।
जेलेन्स्कीले चौथो पुस्ताको लडाकू विमानको माग गरेका छन् । त्यो विमान १२ सय माइल प्रतिघन्टाको गतिमा उड्न सक्छ ।
तर बाइडन प्रशासनमा लडाकू विमान सहयोग गर्ने विषयमा मतभेदको स्थिति छ ।
राष्ट्रिय सुरक्षा उपसल्लाहकार जोनाथन जे फाइनरले यस विषयमा कुनै पक्का निर्णय नगरिएको भए पनि यसको सम्भावना नमरेको बताए ।
‘हामीले कुनै पनि हतियार दिने वा नदिने विषयमा केही भनेका छैनौं,’ फाइनरले बताए ।
यसरी अमेरिकाले एफ–१६ लडाकू विमान दिएमा रुसका राष्ट्रपति भ्लादिमिर पुटिन आक्रोशित बन्नेछन् । अनि रुस र पश्चिमबीच बिग्रेको सम्बन्ध थप खराब बन्न सक्छ ।
जेलेन्स्कीका सल्लाहकार मिखाइलो पोदोल्याकले युद्धविमान लगायतका सैन्य हतियार छिटो उपलब्ध गराउनका लागि आफूहरूले कुराकानी गरिरहेको बताएका छन् ।
