चाहे सर्वसाधारण हुन्, चाहे सेलिब्रेटी, हरेक क्षेत्र र हरेक उमेरसमूह माझ लोकप्रिय छ टिकटक । 

चिनियाँ एप टिकटकको प्रयोगकर्ता नेपालमा पनि लाखौं छन् । पछिल्लो समय त नेपालमा यसको प्रयोग अझ व्यापक भइरहेको छ ।

हामीहरू देख्दै आइरहेका छौं कतिपय गुमनाम मानिसहरू टिकटककै कारण रातारात ‘भाइरल’ बनिरहेका छन् ।

मेला महोत्सवमा कलाकारहरूको प्रस्तुतीमा रमाएको भरमा दर्शकहरू भाइरल भइरहेका छन्, टिकटककै कारण । कतिपयले टिकटकबाटै आफ्नो उत्पादनको प्रचार पनि गरिरहेका छन् । 

पछिल्लो समय टिकटकमा धेरै विकृति देखिएको गुनासो आएपनि यसले धेरैलाई अवसरको ढोका पनि खोलिदिएको छ । यहाँ चर्चा गर्न खोजिएको हो, टिकटकबाट म्युजिक भिडियोमा उदाएकाहरूको । 

उनीहरूका लागि टिकटक फगत मनोरन्जनको माध्यम मात्रै नभएर अभिनय करिअर शुरू गर्ने बलियो प्लेटफर्म बनिदिएको छ । जसले टिकटकमा राख्ने गरेका छोटो भिडियोबाट दर्शकको मन जित्दा म्युजिक भिडियोमा अवसर पाएका छन् । 

टिकटकमा देखाएको प्रतिभाका कारण म्युजिक भिडियोमा उदाउनेहरूमा जुम्ल्याहा दिदीबहिनी प्रिज्मा–प्रिन्सी खतिवडादेखि पछिल्लो समयमा अंश वर्मा, पवित्रा साँकी ‘मिस पबि’सम्म छन् । 

टिकटकबाट भिडियोमा उदाएकी गरिमा शर्मा त यतिबेला चलचित्रमा समेत डेब्यू गरिसकेकी छिन् । टिकटकबाट उदाएका सुधीर श्रेष्ठ, गीता ढुंगानालगायत म्युजिक भिडियोमा छाइरहेका छन् । 

म्युजिक भिडियोमा उदाएका टिकटक स्टारमध्ये पुरुषभन्दा महिला धेरै छन् । टिकटकबाट म्युजिक भिडियोमा उदाएका केही भने गुमनाम पनि भइसकेका छन् ।

अब चर्चा गरौं, टिकटकबाट उदाएका सेलिब्रिटीहरूबारे :

प्रिज्मा– प्रिन्सी खतिवडा

‘ट्विनी गर्ल्स’ नामबाट टिकटकमा चर्चामा आएका जुम्ल्याहा दिदीबहिनी हुन्, प्रिज्मा–प्रिन्सी खतिवडा । 

टिकटक भित्रिएको छोटो समयमै लाखौं फलोअर्स र लाइक पाउने प्रयोगकर्ता बनेका उनीहरूका भिडियो निकै रुचाइए । 

फलस्वरूप उनीहरू म्युजिक भिडियोमा उदाए र निरन्तर सक्रिय रहे । अहिले टिकटकमा ७३ लाख बढी फलोअर्स कमाएका उनीहरूले थुप्रै म्युजिक भिडियोमा सँगसँगै अभिनय गरिसकेका छन् । 

‘हाम्रो माया जिन्दावाद’, ‘रनभुल’, ‘झुमा झुमा’, ‘बाजा बजाउँदै’, ‘तिम्रै मायाले’, ‘बाजा बजाउँदै’, ‘यस्तो बनोस् मेरो तीज’, ‘तिम्रो मन बदलिएछ’ उनीहरूले अभिनय गरेका चर्चित म्युजिक भिडियो हुन् । 

यी जुम्ल्याहा दिदीबहिनीले ‘लभ डायरिज’ चलचित्रको गीतमा समेत नृत्य गरेका छन् । पछिल्लो समय पनि उनीहरू म्युजिक भिडियोमा देखिँदै आएका छन् । उनीहरूले विभिन्न विज्ञापनहरूमा समेत अभिनय गरेका छन् । 

गीता ढुंगाना

अहिलेकी सर्वाधिक व्यस्त मोडल गीता ढुंगाना टिकटकबाटै उदाएकी हुन् । टिकटकमा एक हिसाबको चर्चा कमाएपछि उनी ‘ओए काजल’ बोलको गीतबाट म्युजिक भिडियोमा उदाएकी थिइन् । 

पहिलो गीत नै निकै रुचाइएपछि उनी निरन्तर मोडलिङमा सक्रिय छिन् । उनले मोडलिङ गरेका ‘चौका दाउ’, ‘झमझम झम्कना’, ‘खोली तारिदेउन माझी दाइ’, ‘सरर भागौंला’ लगायतका गीत निकै चर्चित छन् । हिजोआज पनि नियमितरूपमा उनका म्युजिक भिडियोहरू सार्वजनिक भइरहेका हुन्छन् । 

सुधीर श्रेष्ठ

म्युजिक भिडियोमा छाइरहेका मोडल सुधीर श्रेष्ठ पनि टिकटकबाट उदाएका प्रतिभा हुन् । श्रीमती रोशनी श्रेष्ठसँगको सहकार्यमा स्वर्गीय अभिनेता श्रीकृष्ण श्रेष्ठका चलचित्रका गीतमा छोटो प्रस्तुति दिएर उनी दर्शकमाझ रुचाइएका थिए । ‘ए है माया’बोलको गीतमा अभिनय गरेपछि उनी म्युजिक भिडियोमा खोजिँदै गए ।

‘सुनन पियारी’, ‘कुरा काट्ने मान्छेले’, ‘माया गरौंला’, ‘नबोली नबोली’ सुधीरका निकै रुचाइएका भिडियोहरू हुन् ।

यतिबेला पनि उनको अभिनय रहेको ‘मन पराउने हजारौं छन्’ चर्चाको शिखरमा छ । जसका उनी श्रीमती रोशनी श्रेष्ठसँगै प्रस्तुत छन् । 

गरिमा शर्मा

दर्जनौं म्युजिक भिडियोमा अभिनय गरिसकेकी गरिमा शर्मा टिकटकबाटै उदाएकी मोडल हुन् । उनले मोडलिङ गरेका ‘नबोली नबोली’, ‘एउटा सपना छ’, ‘दिन गिन गिन’, ‘पर्दैन पर्दैन मलाई फकाउन’ जस्ता थुप्रै म्युजिक भिडियोहरू रुचाइएका छन् । 

गरिमा यतिबेला चलचित्रको अभिनेत्री समेत बनिसकेकी छिन् । उनको अभिनय रहेको ‘लन्डन टु पेरिस’ प्रदर्शनको तयारीमा छ । नीता ढुंगाना र हरिहर अधिकारीको चलचित्र ‘ह्रस्वदीर्घ’मा पनि गरिमाले अभिनय गर्दैछिन् ।

रेश्मा घिमिरे

मोडल रेश्मा घिमिरे पनि टिकटकबाट चर्चामा आएकी हुन् । 

पहिले चलचित्रमा अभिनय गरेपनि नोटिस हुन नसकेकी घिमिरे पछि टिकटकबाट चर्चामा आएर म्युजिक भिडियोमा छाएकी हुन् ।

‘टिकटक क्विन’ उपनामले परिचित घिमिरेका ‘इन्स्टाको फोटो’ ‘कल्लाई थाहा छैन’, ‘हेरन कान्छी’, ‘गलबन्दी पछ्यौरी’, ‘मन बुढो भएन’, ‘हिजो अर्कैसँग देखें’ लगायतका थुप्रै म्युजिक भिडियो चर्चित छन् । 

पछिल्लो समय भने उनले अभिनय गरेका म्युजिक भिडियो सार्वजनिक हुने क्रम केही घटेको छ । उनको अभिनय रहेको चलचित्र ‘अन्तिम संस्कार’ प्रदर्शनका लागि तयार छ । 

उषा उप्रेती

उषा उप्रेती पनि टिकटकबाट म्युजिक भिडियोमा उदाएकी मोडल हुन् । उनले पनि थुप्रै म्युजिक भिडियोमा मोडलिङ गरिसकेकी छिन् ।  

‘घरमा कोही नहुँदा’, ‘ए माया’, ‘रेलिमै’ जस्ता उनका भिडियो निकै रुचाइएका छन् । 

केही दिनअघि मात्रै उनको अभिनयमा ‘मेरो मनमा तिमी’ गीतको म्युजिक भिडियो सार्वजनिक भएको छ ।

स्मारिका–समारिका ढकाल

जुम्ल्याहा दिदीबहिनी स्मारिका–समारिका ढकाल पनि टिकटकबाटै म्युजिक भिडियोमा उदाएका हुन् । 

टिकटकमा चर्चामा आएपछि मोडलिङमा उदाएका उनीहरूले थुप्रै म्युजिक भिडियोमा अभिनय गरिसकेका छन् । 

हिजोआज पनि उनीहरूका म्युजिक भिडियो सार्वजनिक भइरहेका हुन्छन् । यी दिदीबहिनीले थुप्रै भिडियोमा सँगै अभिनय गरेका छन् भने उनीहरू छुट्टाछुट्टै रूपमा पनि भिडियोमा देखिँदै आएका छन् ।

विना राउत

मोडल विना राउत पनि टिकटकबाटै चर्चामा आएकी हुन् । मोडल सरोज राना प्रजासँग उनले बनाउने भिडियो टिकटकमा निकै रुचाइने गरेका छन् । टिकटकमा चर्चा हुनुअघि नै म्युजिक भिडियो खेलेपनि टिकटकमा चर्चामा आएपछि उनको व्यस्तता ह्वात्तै बढेको हो ।

‘तोरी तेल लाएर कपाल कालो भो’, ‘रातो गुलाब’, ‘मेरो माया बसेको गाउँमा’, ‘मोहनी मन्तर’, चाइनिज पिलेट’, ‘पोखरेली नानी’ ‘कोकाकोला फिगर’, ‘सुटुक्कै’ उनले अभिनय गरेका केही म्युजिक भिडियो हुन् । म्युजिक भिडियोमा छोटो समयमै उनले पाएको सफलता लोभलाग्दो छ । 

मञ्जिल बस्नेत

म्युजिक भिडियोमा जमिरहेका मञ्जिल बस्नेत पनि टिकटकबाटै उदाएका हुन् । टिकटकमा थुप्रै फ्यान कमाएका उनका म्युजिक भिडियोलाई पनि दर्शकहरूले रुचाउँदै आएका छन् ।

‘रनभुल’, ‘घाममा सुकाइदेऊ’, ‘तरकारी’, ‘लभ लेटर’, ‘हुन्छ खोसाखोस’ लगायतका उनको अभिनय रहेका भिडियोले लाखौं भ्युज पाएका छन् ।  

मिस पबि

मिस पबि पनि टिकटकबाट म्युजिक भिडियोमा उदाएकी मोडल हुन् । डडेल्धुराकी उनी टिकटकमा निकै चर्चित छिन् । पछिल्लो समय उनले एकपछि अर्को म्युजिक भिडियोमा मोडलिङ गरिरहेकी छिन् । 

म्युजिक भिडियोमा उनको व्यस्तता बढेको भने धेरै भएको छैन । डेढ महिनाअघि सार्वजनिक ‘जुम्ला’ बोलको गीतले चर्चा पाएसँगै उनलाई एकपछि अर्को म्युजिक भिडियोमा मोडलिङका लागि ‘अफर’ आउन लागेको हो । त्यसयता उनका आधा दर्जन बढी म्युजिक भिडियो सार्वजनिक भइसकेका छन् भने उनले वेब सिरिज र टेलिसिरियल ‘मेरी बास्सै’मा समेत अभिनय गरिसकेकी छिन् ।

विजय पुन 

अहिले एकपछि अर्को म्युजिक भिडियोमा काम गरिरहेका मोडल विजय पुन टिकटकबाटै चर्चामा आएका हुन् । 

‘पत्थरको मुटु’ भनेर उनले टिकटकमा पोस्ट गर्ने वियोगान्त भिडियोलाई दर्शकहरूले रुचाउँदै आएका थिए । 

मोडल पुनले छोटो समयमा राम्रै संख्यामा म्युजिक भिडियोमा अभिनय गरेका छन् । ‘पत्थरको मुटु’, ‘कञ्चन’, ‘अभागी’, ‘घर कता हो बैनीको’, ‘मन भुल्छ’ लगायत गीतको भिडियोमा मोडल पुनको अभिनय हेर्न सकिन्छ । गत शुक्रवार मात्रै पनि उनको अभिनयमा ‘पिरती’बोलको गीत सार्वजनिक भएको छ । 

अंश बर्मा

अंश बर्मा चर्चित टिकटक स्टार हुन् । टिकटकमा २४ लाखभन्दा बढी फलोअर्स कमाएका उनी पनि म्युजिक भिडियोमा उदाएका छन् । 

‘सुन चाँदी धन सम्पत्ति’, ‘मेरी राइझुमा’, ‘छैन मन यो वशमा’, ‘ए साइँली’, ‘तिमीले घात गरेऊ’ लगायतका म्युजिक भिडियो अंश बर्माले आफ्नै अफिसियल युट्युब च्यानलमार्फत सार्वजनिक गरेका छन् । 

अमृत–अमर दाहाल

अमर–अमृत दाहाल पनि टिकटकबाटै म्युजिक भिडियोमा उदाएका हुन् । यी जुम्ल्याहा दाजुभाइले थुप्रै म्युजिक भिडियोमा संगै सहकार्य गरेका छन् । 

‘बरीलै’, ‘दाउ लागे बिहे गरौंला’, ‘छल छल’, ‘मुटुमा खिल बस्यो’, ‘कान्छी मुसुक्कै पैसा भुसुक्कै’ लगायतका गीतको भिडियोमा उनीहरूको नृत्य हेर्न सकिन्छ । 

जो केही समय जमे, अहिले गुमनाम देखिएका छन् 

टिकटकबाट म्युजिक भिडियोमा उदाएकामध्ये केही भने अहिले गुमनामजस्तै देखिएका छन् । 

टिकटकबाट पाएको लोकप्रियताकै कारण जुम्ल्याहा दिदीबहिनी दीपा–दमन्ता श्रेष्ठले म्युजिक भिडियोमा काम पाए ।

‘दीपादमन्ता’ नामबाट टिकटकमा २९ लाख बढी फलोअर्स कमाएका यी दिदीबहिनीले केही समय राम्रै संख्यामा म्युजिक भिडियोमा अभिनय गरेका थिए । उनीहरू हिजोआज भने म्युजिक भिडियोमा देखिन छाडेका छन् ।

‘अमिलो निम्बु’, ‘पारै मिलेन’, ‘साडी मलमल’, ‘सुनको चन्द्रमा’ लगायतका थुप्रै गीतको भिडियोमा उनीहरूको अभिनय हेर्न सकिन्छ । 

अर्की, टिकटक स्टार श्रेया सिटौला पनि हिजोआज म्युजिक भिडियोमा देखिन छाडेकी छिन् । टिकटकबाट पाएको चर्चाका कारण उनले थुप्रै म्युजिक भिडियोमा अभिनय गर्ने अवसर पाएकी थिइन् । 

‘कान्छी मट्याङ ट्याङ’, ‘त्यस्तै त्यस्तैमा’, ‘केटो अलि कमाउने होस्’, ‘मै मरी जाम’ लगायतका गीतको भिडियोमा श्रेयाको अभिनय हेर्न सकिन्छ । पुरु सिग्देल, प्रकाश चन्दलगायत पनि टिकटकबाट उदाएर केही म्युजिक भिडियोमा देखिएका थिए ।

हिजोआज भने उनीहरू म्युजिक भिडियोबाट गुमनामजस्तै छन् ।