०१ असार २०८३, सोमबार
लुम्बिनी प्रदेशका मुख्यमन्त्री लिला गिरीले मन्त्रिपरिषद विस्तारको तयारी थालेका छन्। सम्भवतः आइतबार प्रदेश मन्त्रिपरिषद विस्तार हुनसक्ने उनको सचिवालयले जानकारी दिएको छ । यसअघि नेकपा (एमाले) बाट चेतनारायण आचार्य र माओवादी केन्द्रका कृष्ण केसी मन्त्रीको जिम्मेवारी पाएका छन् ।
नयाँ थपिने मन्त्रीहरुमा माओवादी केन्द्रका संसदीय दलका नेता जोखबहादुर महरा, इन्द्रजित थारु सम्भावित सूचीमा छन्। माओवादीले आर्थिक मामिला, आन्तरिक मामिला तथा कानून मन्त्रालय र भौतिक पूर्वाधार मन्त्री पाउने करिब निश्चित भएको छ । महराले आर्थिक मामिला मन्त्री बन्नेछन् । बाँकी ७ मन्त्रालय साना दललाई समेत मिलाउने गरी एमालेले तयारी थालेको छ ।
एमालेबाट विष्णु पन्थी, तुल्सीराम शर्मा, दुर्गा थारु मन्त्री बन्ने सम्भावना छ । पन्थीले स्वास्थ्य मन्त्रालय पाउने प्रवल सम्भावना छ। मुख्यमन्त्रीसहित १० मन्त्रालयमा एमालेलाई ४, माओवादीलाई ३ तथा राप्रपा, जनमत र जसपाले एक एक मन्त्रालय लिनेगरी दलहरुले समझदारी बनेको छ । नागरिक उन्मुक्ति पार्टी माग सम्बोधन नभएसम्म सरकारमा सहभागी नहुने जनाएको छ ।
आइतबार शपथका लागि प्रदेश सरकारले तयारी थालेको मुख्यमन्त्री कार्यालयका एक सदस्यले बताए । पुस २७ मा सात दलको समर्थनमा मुख्यमन्त्रीमा एमालेका नेता लिला गिरी नियुक्ति भएका थिए । त्यसको भोलिपल्ट पुस २८ मा मुख्यमन्त्रीसँगै दुई जना मन्त्रीले शपथ लिएका थिए । तर उनीहरुको मन्त्रालय जिम्मेवारी टुंगिएको छैन । अहिले विनाविभागीय मन्त्रीको रुपमा रहेका छन् ।
मुख्यमन्त्री पाएको एमालेले माओवादी केन्द्रलाई अर्थ, भौतिक पूर्वाधार र आन्तरिक मामिला मन्त्रालय दिन तयार भएपछि सहमति जुटेको माओवादी केन्द्रले जनाएको छ । माओवादीले कुल ३ मन्त्रालय पाउनेछ । माओवादी प्रदेश अध्यक्ष सुदर्शन बरालले अर्थ, भौतिक पूर्वाधार र आन्तरिक मामिला पाउनेगरी सहमति भएको बताए ।
माओवादीबाट दलका नेता जोखबहादुर महरा अर्थमन्त्रालयल लिएर सरकारमा पार्टीको नेतृत्व लिनेछन् । अन्य एक मन्त्रीमा टुंगो लाग्न बाँकी रहेको बरालले बताए । यसअघि मन्त्री बनिसकेका इन्द्रजित चौधरी, स्वतन्त्रबाट जितेर माओवादी प्रवेश गरेका रोल्पाका दिपेन्द्र पुन तथा दाङ ३ को (२) बाट निर्वाचित धनबहादुर मास्की बलियो दावेदार रहेको उनको भनाइ छ ।
एमालेबाट लिला गिरी मुख्यमन्त्री र उपनेता चेतनारायण आचार्य मन्त्री बनिसकेका छन् । एमालेले शहरी विकास, सामाजिक विकास, स्वास्थ्य मन्त्रालय पाउने भएको छ । शहरी विकासमा चेतनारायण आचार्यले दावी गरेका छन् । स्वास्थ्य वा सामाजिक विकासमा विष्णु पन्थीको प्रवल सम्भावना छ ।
अन्य दुई मन्त्रीमा एमालेबाट आकांक्षी धेरै भएकाले मिलाउने प्रयास भइरहेको सो दलले जनाएको छ । जसपा, राप्रपा र जनमत पार्टीले सरकारमा जाने मन्त्रीको टुंगो लगाइसकेको बताइएको छ ।
राप्रपाले कपिलवस्तुका जानकीप्रसाद यादवलाई सरकारमा पठाउने निर्णय गरेको छ । राप्रपाका प्रदेश अध्यक्ष प्रदीप उदयका अनुसार राप्रपाले उद्योग तथा पर्यटन वा सामाजिक विकासमध्ये एउटा मन्त्रालय पाउने छ । जनमत पार्टीबाट रुपन्देही ५ को (२) बाट निर्वाचित संसदीय दलका नेता चन्द्रकेश गुप्ता सरकारमा जाने भएका छन् ।
