०८ साउन २०८३, शुक्रबार
टर्की (टुर्किये) का अधिकारीहरूले भूकम्पपछि लुटपाट तथा ठगी गर्ने ४८ जनालाई पक्राउ गरेको त्यहाँको सरकारी सञ्चारमाध्यमले खबर दिएको छ ।
विभिन्न आठवटा प्रान्तमा ती व्यक्तिहरूलाई पक्राउ गरिएको एनाडोलु समाचार संस्थाले लेखेको छ ।
दक्षिणको हाटे प्रान्तमा लुटपाट गर्ने ४२ जनालाई पक्राउ गरिएको छ भने गानियान्टेपमा एकजना पीडितलाई फोनमार्फत ठग्ने ६ जनालाई पक्राउ गरिएको छ ।
गत सोमवार आएको भूकम्पमा परी २८ हजारजनाको ज्यान गएको छ ।
टुर्कियेका राष्ट्रपति रेचेप तैयिप एर्दोआनले दक्षिणपूर्वी टर्कीका १० वटा प्रान्तमा तीन महिनाको संकटकाल घोषणा गरेका छन् ।
संकटकालबाट प्राप्त अधिकारपछि प्रहरीले लुटपाटका अपराधमा संलग्न व्यक्तिहरूलाई थप तीन दिन हिरासतमा राख्न पाउने भएका छन् । यसअघि उनीहरूलाई चार दिनसम्म हिरासतमा राख्न पाइन्थ्यो ।
लुटपाट गर्नेहरूलाई कारवाही गरिने प्रतिज्ञा एर्दोआनले शनिवार गरेका छन् ।
