०८ साउन २०८३, शुक्रबार
लोकतान्त्रिक समाजवादी पार्टी (लोसपा) का अध्यक्ष महन्थ ठाकुरलाई राष्ट्रपति बनाउने प्रस्ताव लिएर सो दलका नेताहरु नेपाली कांग्रेसका सभापति शेरबहादुर देउवा निवास पुगेका छन् । राष्ट्रपतिमा सहयोग गर्न मागसहित छलफल गर्न नेताहरु धुम्बाराहीस्थित रहेको सभापति देउवा निवास पुगेका हुन् ।
राष्ट्रपति निर्वाचनका लागि मनोनयन दर्ताको समय नजिकिएसँगै राजनीतिक दलका नेताहरुको भेटघाट र छलफल बाक्लिएको छ । लोसपका नेताहरु हिजो मंगलबार प्रधानमन्त्री तथा नेकपा (माओवादी केन्द्र) का अध्यक्ष पुष्पकमल दाहाल प्रचण्डसँग छलफल गरेका थिए । त्यस्तै, हिजो नै सो दलका नेताहरु नेकपा (एमाले) का अध्यक्ष केपी शर्मा ओलीसँग छलफल गर्न बालकोट पुगेका थिए । आज हुने छलफलमा पनि सोही विषयमा छलफल गर्न नेताहरु सभापति देउवा निवास पुगेका हुन् ।
‘सहमतीय राष्ट्रपतिका लागि महन्थ ठाकुर उपयुक्त पात्र भएको भन्दै सो दलका नेताहरुले सहमतिको प्रयासमा आफूहरु सक्रिय भएको बताएका छन् । सभापति देउवालाई भेट्न सो दलका नेताहरु ठाकुरसहित राजेन्द्र महतो, शरतसिंह भण्डारी, अनिल झा लगायतका नेता सभापति देउवा निवास पुगेको सो दलका नेता अनिल झाले जानकारी दिए । विहान ९ः३० बजे छलफलको समय तय भए पनि छलफल शुरु नभएको उनले बताए । "म सभापति देउवा निवासमा भर्खर पुगें, अरु नेताहरु आउँदै हुनुहुन्छ, सम्भवतः १० बजेतिर छलफल शुरु होला" उनले बताए ।
