प्रधानमन्त्री तथा नेकपा (माओवादी केन्द्र) का अधयक्ष पुष्पकमल दाहाल प्रचण्डसँग छलफल गर्न नेकपा (एमाले) का अध्यक्ष केपी शर्मा ओली बालुवाटार पुगेका छन् । केहीबेरअघिदेखि प्रधानमन्त्रीको सरकारी निवास बालुवाटारमा दुई नेताबीच छलफल जारी छ । 

राष्ट्रपति निर्वाचनको मिति नजिकिएसँगै नेताहरुको राजनीतिक दौडधुप र भेटघाट तिव्र बनेको छ । अध्यक्ष ओली राष्ट्रपति निर्वाचनकै विषयमा छलफल गर्न बालुवाटार पुगेको प्रधानमन्त्री प्रचण्डको सचिवालयले जनाएको छ । दुई नेताबीच यसअघि पनि राष्ट्रपतिको विषयलाई लिएर पटक पटक छलफल भएको छ । 

माओवादी केन्द्रको पदाधिकारी बैठकले राष्ट्रपति विषयमा निर्णय गर्ने अख्तियारी अध्यक्ष प्रचण्डलाई दिएपछि एमाले अध्यक्ष ओली आज छलफल गर्न बालुवाटार पुगेका हुन् । बैठकमा अरु नेताहरुको सहभागिता नरहेकाले आजको बैठकले केही निर्णय गर्न सक्ने बुझाई नेताहरुको छ । माओवादी केन्द्रले सहमतीका आधारमा साझा व्यक्तित्वलाई राष्ट्रपति बनाउनुपर्ने अडान राखेको छ । 

यता सत्ता साझेदार दल एमालेले गत पुस १० गते भएको सहमतिअनुसार एमालेले दिने उम्मेदवारलाई राष्ट्रपतिमा सहयोग गर्नुपर्ने अडान यथावत राखेको छ । पछिल्लो समय एमालेको दोस्रो तहका नेताहरुले साझा व्यक्तिलाई उम्मेदवार दिएर भएपनि वर्तमान गठबन्धन जोगाउनुपर्ने सुझाव दिन थालेका छन् । यसबीचमा अध्यक्ष ओली दवावमा परेका छन् । केहीदिन अघि प्रधानमन्त्री प्रचण्डले कांग्रेस नेतासँगको छलफलमा अध्यक्ष ओलीले नेता माधवकुमार नेपाललाई राष्ट्रपतिमा प्रस्ताव गर्न सक्ने बताएका थिए ।