मोरङको सुनवर्षी नगरपालिका–१ का १४ वर्षीय बालक विशाल माझीको हत्या गरेको आरोपमा प्रहरीले एक दम्पतीलाई पक्राउ गरेको छ ।

पक्राउ पर्नेमा ३५ वर्षीय वीरेन्द्र पासवान र उनकी ३४ वर्षीया पत्नी डिल्ली पासवान छन् । पत्नी डिल्लीसँग विशालले अवैध सम्बन्ध राखेको भन्दै वीरेन्द्रले चक्कु प्रहार गरी १ हप्ताअघि हत्या गरेको खुलेको मोरङ प्रहरीले जनाएको छ ।

फागुन ११ गते साँझ ८ बजे विशालको हत्या भएको प्रहरीले जनाएको छ । 

माझीको हत्या गरेर घरनजिकको पोखरीको डिलमा खाडल खनेर शव गाडेको अवस्थामा मोरङ प्रहरीले बुधवार भेट्टाएको थियो । हत्या गरेको ६ दिनपछि प्रहरीले शव फागुन १७ गते फेला पारेको मोरङ प्रहरीका प्रवक्ता डीएसपी टीकाबहादुर कार्कीले बताए ।
 
प्रहरीको प्रारम्भिक अनुसन्धानबाट वीरेन्द्रकी पत्नी डिल्लीसँग अवैध सम्बन्ध रहेको आशंकामा विशालको हत्या गरिएको खुलेको छ । मृतक माझी र डिल्लीको घर नजिकै छ । वीरेन्द्र कल गाढ्ने र बनाउने काम गर्ने मिस्त्री हुन् ।

पत्नीसँग अवैध सम्बन्ध रहेको आशंकामा वीरेन्द्रले हत्याको योजना बनाएको प्रहरी अनुसन्धानबाट खुलेको छ । 

फागुन ११ साँझ वीरेन्द्रले घरमा बोलाएर घरबाट ५०० मिटर पर पोखरीको डिलमा लगेर चक्कु प्रहार गरेर हत्या गरेको प्रारम्भिक अनुसन्धानबाट खुलेको अनुसन्धान खटिएका प्रहरी अधिकृतहरू बताउँछन् । 

वीरेन्द्र र उनकी पत्नी डिल्लीले हत्या गरेको ३ दिनपछि मात्र विशाल हराएको सूचना प्रहरीकहाँ पुगेको थियो । छोरा हराएको भन्दै बुवा डिल्लीबहादुर माझी ईलाका प्रहरी कार्यालय रंगेलीमा पुगेका थिए ।

विशाल ८ कक्षामा अध्ययनरत विद्यार्थी हुन् । प्रहरीले पासवानलाई नियन्त्रणमा लिएर अनुसन्धान गरेपछि घटना स्वीकार गरेको प्रहरीले जनाएको छ ।

पक्राउ परेका दुवै जनालाई रंगेली प्रहरीले बुधवार मोरङ अदालतमा कर्तव्य ज्यान मुद्दामा ७ दिनको म्याद थप गरेर अनुसन्धान शुरू गरेको मोरङ प्रहरीका प्रवक्ता डीएसपी कार्कीले जानकारी दिए ।