थाइल्याण्ड, १० भदौ चामल अनुदान परियोजनामा भएका भनिएका भ्रष्टाचारको मुद्दामाथिको सुनुवाईमा अदालतले आदेश दिनुअघि थाइल्याण्डकी पूर्व प्रधानमन्त्री यिङलक शिनावात दुबई उडेको उनको दलले जनाएको छ ।
चामल अनुदान परियोजनामा लापरवाही गरेको आरोप लागेका शिनावात विदेश गइसकेको पार्टी स्रोतले जानकारी गराएको छ । उनी केही दिन पहिल्यै थाइल्याण्डबाट बाहिरिएकोे शुक्रबार जानकारी गराइएको थियो । उनी बेलायत जाने क्रममा दुबई पुगेको उनको दलका वरिष्ठ सदस्यले जनाए ।
पूर्व प्रधानमन्त्री शिनावातलाई शुक्रबार अदालतमा सुनुवाइका लागि उपस्थित हुन भनिएको थियो तर उपस्थित नभएपछि अदालतले उनलाई पक्राउ गर्न अदालतले आदेश जारी गरेको थियो । उनको धरौटी जफत गरिएको थियो ।
शिनावातविरुद्धको मुद्दामा शुक्रबार फैसला सुनाउने तयारी गरेको सर्वोच्च अदालतले फैसला अर्को महिना गर्ने जनाएको छ । उनी बेलायत जानेक्रममा कम्वोडिया–सिङ्गापुर हुँदै दुबई पुगेको, जुन्ता दलका एक सदस्यले बताए । दुबईमा उनका दाजु पूर्व प्रधानमन्त्री थाक्सिन शिनावात स्वघोषित निर्वासनमा बसिरहेका छन् ।
उनले भने, “हामीले उहाँ क्याम्बोडिया हुँदै सिंगापुर पुगेको र त्यहाँबाट दुबईका निम्ति उडेको थाहा पाएका छौँ । उहाँ सकुशल त्यहाँ पुगेर बसिरहेको जानकारी छ ।” “उहाँ बेलायत जाने योजना छ ।”
त्यस प्रकरणमा दोषी ठहरिएमा पूर्व प्रधानमन्त्रीलाई १० वर्ष जेल सजाय हुनसक्नेछ ।
