सरकारको नेतृत्वकर्ता दल नेकपा (माओवादी केन्द्र)ले राष्ट्रिय सहमतिका लागि लिएको कदमबारे इतिहासको कठघरामा उभिएर जवाफ दिन तयार रहेको बताएको छ ।

पुस १० गतेको सहमतिविपरीत कांग्रेससँग सहकार्य गर्नुको कारणबारे एमालेले सोधेको प्रश्नको जवाफमा माओवादीका तर्फबाट यस्तो प्रतिक्रिया आएको हो ।

सोमवार प्रतिनिधिसभा बैठकमा प्रधानमन्त्री पुष्पकमल दाहाल ‘प्रचण्ड’ले मागेको विश्वासको मतसम्बन्धी प्रस्तावमाथिको छलफलमा माओवादीका देवेन्द्र पौडेलले राष्ट्रिय सहमतिको कुरा गर्दा एमालेले सरकार छाडेको आरोप लगाए । 

‘पहिलो दललाई सहमतिमा लिएर जानुपर्ने अहिलेको जनमत हो । त्यही कुरा प्रधानमन्त्रीले गर्नुभएको हो,’ एमालेका विष्णु पौडेललाई जवाफ दिँदै देवेन्द्रले भने । 

त्यसअघि एमाले उपाध्यक्ष पौडेलले पुस १० मा एउटा सहमति गरेर राष्ट्रपतिमा कांग्रेसलाई समर्थन गर्ने अवस्थाबारे प्रचण्डले इतिहासमा कुनै दिन जवाफ दिनुपर्ने बताएका थिए ।