१५ असार २०८३, सोमबार
प्रधानमन्त्री पुष्पकमल दाहाल प्रचण्डले आफ्नो सरकार वैशाखसम्म मात्र रहने भनेर एमाले अध्यक्ष केपी शर्मा ओलीले भनेको बताएका छन् ।
कांग्रेससँग राष्ट्रपतिबारे सहमति हुनुअघिको अन्तिम भेटमा ओलीले पटक-पटक यो सरकार वैशाखभन्दा उता जाँदैन भनेको जानकारी प्रचण्डले दिए ।
'केपीजीले छुट्ने बेलामा धेरै नै ठूल्ठूला शिक्षा दिएर पठाउनुभाछ । यसका लागि पनि केपीजीलाई धन्यवाद नै भन्न चाहन्छु,' विश्वासको मतमाथिको प्रस्तावमा उठेका सवालहरूको जवाफ दिने क्रममा प्रचण्डले सोमवार संसदमा भने, 'पटक-पटक उहाँले तपाईं वैशाखभन्दा उता जानुहुन्न । वैशाखमा (सभामुख)को बायाँपट्टिको लबीमा तपाईं र म एकै ठाउँमा हुन्छौं भन्नुभाछ । उहाँको भनाइलाई पुष्टि गर्ने कि फेल गर्ने हामी सबैको हातमा छ ।'
सभामुखको बायाँतर्फ प्रतिपक्षी दलका नेताहरू बस्ने गर्छन् ।
उनले दुवै गएर कांग्रेसलाई राष्ट्रपति दिऊँ भन्ने आफ्नो प्रस्ताव ओलीले नमानेको जिकिर गरे ।
'नेपाली कांग्रेसलाई राष्ट्रपति दिऊँ, तपाईं र म नै गएर भनौं भनेको थिएँ लास्ट दिनमा । उहाँले इमान्दारिता साथ नै भन्नुभयो, त्यो सक्दिनँ । त्यसपछि त हामी सँगै रहने स्थिति बनेन,' प्रचण्डले थपे ।
