महेन्द्र क्याम्पस दाङमा कम्युनिष्ट विद्यार्थीको गठबन्धनलाई हराउँदै नेविसंघ विजयी

दाङको घोराहीस्थित महेन्द्र बहुमुखी क्याम्पसको स्ववियु निर्वाचनमा कांग्रेसनिकट नेपाल विद्यार्थी संघ (नेविसंघ) विजयी भएको छ ।

नेविसंघका मनोज डिसीले अखिल संयुक्तका उम्मेदवार हिमाल महरालाई हराउँदै निर्वाचित भए।

स्ववियुमा नयाँ नेतृत्व चयनका लागि बुधबार भएको मतदानको मतपरिणामअनुसार विजयी डिसीले १ हजार ९६ मत प्राप्त गर्दै जिल्लाकै सबैभन्दा पुरानो र धेरै विद्यार्थी अध्ययनरत क्याम्पसको स्ववियु सभापतिमा विजयी भए । पराजित महराले ६२० मत मात्रै प्राप्त गरे ।

क्याम्पसमा एमालेनिकट अनेरास्ववियु, माओवादीनिकट अखिल क्रान्तिकारी र राष्ट्रिय जनमोर्चा निकट अखिल छैठौँले तालमेल गरेका थिए ।

सचिवमा ९५५ मत प्राप्त गर्दै नेविसंघकै वसन्त भण्डारी विजयी भए। उनका प्रतिस्पर्धी अखिल संयुक्तका रविभक्त केसीले ५८३ मत मात्र ल्याउन सके । कोषाध्यक्षमा पनि नेविसंघकै ममता केसी ९९६ मत विजयी भइन्। अखिल संयुक्तका सागर पण्डितले ६ सय ९४ मत प्राप्त गरि पराजित भए ।

सदस्यमा नेविसंघका वसन्त कँडेल,सुरेश पोख्रेल,विवेक खनाल,जीवन डिसी,अनिष कुमार चौधरी, रमिला चौधरी, पुष्पकमल दाहाल र अनेरास्वियुका सविन पोख्रेल विजयी  भएका छन् ।

चैतको ५ गते स्वतन्त्र विद्यार्थी युनियनको निर्वाचन गर्ने कार्यतालिका रहे पनि विप्लवनिकट अखिल क्रान्तिकारीले गरेको तालाबन्दीका कारण चैत ८ गते महेन्द्र बहुमुखी क्याम्पसमा निर्वाचन भएको थियो ।