जर्मनीको सार्वजनिक सवारी मजदूरहरूले गरेको २४ घन्टे हडतालका कारण सोमवार बस, ट्रेन र विमानहरू रोकिएका छन् । 

हडतालको तयारीका कारण नै सप्ताहान्तमा यात्रा अवरुद्ध भएका थिए । 

सार्वजनिक क्षेत्रका रोजगारदाताहरूले दुईवटा प्रमुख ट्रेड युनियनसँग तलब बढाउने विषयमा सम्झौता गर्न खोजिरहेका छन् । तेस्रो चरणको वार्ता शुरू भएलगत्तै हडताल आयोजना गरिएको हो । 

विमान कर्मचारीको हडतालका कारण लगभग ४ लाख यात्रुहरूले ढिलाइ वा यात्रा रद्द गर्नुपरेको छ । 

हडतालका कारण प्रमुख बन्दरगाहहरूमा मालवाहक र यात्रुवाहक जहाजहरूको आवागमनमा पनि बाधा पुगेको छ । 

अनि रेलवेका ३० हजारभन्दा बढी मजदूर पनि हडतालमा सहभागी भएपछि रेलसेवा रोकिएको छ । लामो तथा छोटो दूरीका रेलहरू गुडेका छैनन् ।