नेपाली सेनाका प्रधान सेनापति प्रभुराम शर्माले हिमाल सफाइ अभियानमा जनस्तरबाट सहभागी हुनुपर्ने बताएका छन् । मंगलबार जङ्गी अड्डामा ‘सफा हिमाल अभियान–२०२३’को झन्डोत्तोलन गर्दै सेनापति शर्माले नागरिकको सहभागितामा मात्रै यो अभियान सफल हुने बताएका हुन् ।

‘यो सार्वजनिक महत्वको र जनचासोको विषय भएकाले यस्ता समस्या समाधान गर्न जटिल छ ।  यसलाई कालान्तरमा लैजान जनसहभागिताको आवश्यक पर्छ, प्रधान सेनापति शर्माले भने । 
नेपाली सेनाले विगतका अनुभवबाट अबको हिमाल सफाइमा थप राम्रो काम गर्ने उनको भनाइ छ ।   विश्वमा हरितगृह ग्यासको असरले नेपालका हिमालमा असर परेको छ भने त्यसको असरलाई न्यूनीकरण गर्न नेपाली सेना र सरकारी निकायले मिलेर काम गर्दै आएका छन् । सेनाले आफ्नो जनशक्तिको १० प्रतिशत जनशक्ति पर्यावरणमा खटाएको सेनापति शर्माले जानकारी दिए । 

सेनाले आजदेखि चौथो सफा हिमाल अभियान सुरुवात भएको जनाएको छ । सेनाले सगरमाथा, ल्होत्से, अन्नपूर्ण र बरुथे हिमालबाट ३५ टन फोहोर संकलन गर्ने लक्ष्य लिएको छ । यस अन्तर्गत सेनाले सगरमाथा र ल्होत्से हिमालको बेसक्याम्प वरपर ३ टन  र बेसक्याम्प माथिबाट १२ टन गरी १५ टन तथा  अन्नपूर्ण हिमाल बेसक्याम्प वरपर ३ टन  र बेसक्याम्प माथिबाट ७ टन गरी  १० टन फोहोर संकलन गर्ने लक्ष्य लिएको छ । यसैगरी बरुथेको बेसक्याम्प माथिबाट ५ टन र बेस क्याम्प वरपरबाट ५ टन गरी १० टन संकलनको लक्ष्य लिएको छ । 

सेनाले सन् २०१९ बाट हिमाल सफाइ अभियान थालेको  थियो । ०१९ मा १० टन, सन् २०२१ मा २७.६ टन र सन् २०२२ मा ३३.८ टन फोहोर गरी अहिलेसम्म ७२ टन फोहोर र ४ वटा शव संकलन गरेको सेनाले जनाएको छ । 
संकलन गरेको फोहोरलाई कुहिने र नकुहिने गरि २ भागमा छुट्याएर कुहिने जित स्थानीय तहलाई हस्तान्तरण गरिने छ । नकुहिनेचाहिँ वेस्ट म्यानेजमेन्ट कम्पनीलाई दिने सेनाले जनाएको छ ।