‘लोकान्तर राउण्ड अप’ मा पाठकवृन्दलाई स्वागत छ । सधैँझैँ आज पनि हामी बितेका २४ घण्टाका मुख्यमुख्य घटनाक्रमसहित उपस्थित भएका छौँ–
भागबण्डाको विषयले नेपाली कांग्रेसमा विवाद चर्किएको छ । सभापति शेरबहादुर देउवाले प्रचण्ड नेतृत्वको सरकारमा इतर समूहलाई कम भाग दिएको भन्दै विवाद चर्किएको हो । देउवाले दुई वटा मन्त्रालय मात्रै दिएकोमा असन्तुष्टि जनाउँदै शेखर कोइराला–गगन थापा समूहले शुक्रबार आफ्नोतर्फबाट मन्त्री नै पठाएन ।

जसका कारण आठ मन्त्रालय पाएको कांग्रेसबाट शुक्रबार ४ जनाले मात्रै शपथ लिए । कांग्रेसमा भागबण्डाको विषयमा विगतदेखि नै विवाद हुँदै आएको छ । गुटउपगुट र भागबण्डाको विषयमा पार्टी फस्दै आएको छ । 
००००
कांग्रेसभित्रको विवादका बीच प्रधानमन्त्री पुष्पकमल दाहाल प्रचण्डले शुक्रबार मन्त्रिपरिषद् विस्तार गरे । प्रधानमन्त्री प्रचण्डको सिफारिशमा राष्ट्रपति रामचन्द्र पौडेलले नयाँ मन्त्रिहरूको नियुक्ति र शपथ गराएका हुन् । जसमा कांग्रेसका पूर्णबहादुर खड्का, डा प्रकाशशरण महत, रमेश रिजाल र सीता गुरुङ गरी चार जना मन्त्री रहेका छन् । 
सरकारमा प्रधानमन्त्रीपछिको वरीयतामा रहने गरी कांग्रेस उपसभापति खड्का उपप्रधान तथा रक्षामन्त्री बनेका छन् ।

अर्का उपप्रधानमन्त्री नारायणकाजी श्रेष्ठको जिम्मेवारी हेरफेर गरी भौतिक पूर्वाधारबाट गृह मन्त्रालयमा सरुवा गरिएको छ । 
त्यसपछिको वरीयतामा क्रमशः बेदुराम भुसाल कृषि तथा पशुपन्छी, अशोक राई शिक्षा, शरत सिंह भण्डारी श्रम र डा प्रकाशशरण महत अर्थमन्त्री बनेका छन् ।

कांग्रेसको भागमा परेका ४ र जनमतले राजीनामा दिएको एक गरी ५ मन्त्रालय प्रधानमन्त्री प्रचण्ड आफैंले राखेका छन् । उद्योग मन्त्रालयमा दाबी गर्दै आएका जनमतका अब्दुल खानले भने बुधबार नै राजीनामा बुझाएका हुन् । उनी खानेपानी मन्त्रालयको भूमिकामा थिए । 
००००
सरकारबाट बाहिरिएपछि जनमत पार्टीका अध्यक्ष डा सीके राउतले आफूहरू मन्त्री पदका लागि सत्तामा टाँसिएर बसिरहनुको औचित्य नरहेको प्रस्ट्याएका छन् । 
जनमतका तर्फबाट सरकारमा सहभागी भएका खानेपानी मन्त्री अब्दुल खानले राजीनामा दिएपछि राउतले फेसबूकमार्फत आफ्नो धारणा सार्वजनिक गरेका हुन् ।
नवनियुक्त मन्त्रीहरुले भने शुक्रबार नै सिंहदरबारमा पुगेर पदभार ग्रहण गरेका छन् । 
००००
यसैबीच प्रधानमन्त्रीले शुक्रवार मन्त्रिपरिषद् विस्तार गरेपनि सरकारले अझै पूर्णता पाउन सकेको छैन । नेपाली कांग्रेसको डा शेखर कोइराला–गगन थापा पक्षले मन्त्रीको नाम नदिएपछि प्रचण्डले सरकारलाई पूर्णता दिन नसकेका हुन् ।
परराष्ट्र, स्वास्थ्य तथा जनसंख्या, कानून, न्याय तथा संसदीय मामिला, युवा तथा खेलकुद र वन तथा वातावरण मन्त्रालय प्रचण्डले आफूसँगै राखेका छन् । यस्तै खानेपानी मन्त्रालय पनि रिक्त बनेको छ। 
००००
अर्थमन्त्री प्रकाशशरण महतले अर्थतन्त्रलाई राहत दिने गरी प्राथमिकता निर्धारण गरेर काम गर्ने बताएका छन् । शुक्रवार पदभार ग्रहण गर्दै अर्थमन्त्री महतले अर्थतन्त्रलाई संकटमा जान नदिने प्रतिबद्धता जनाएका हुन् ।
अहिले असहज अवस्थामा रहेको अर्थतन्त्रलाई सहज बनाउनुपर्ने पहिलो प्राथमिकता अर्थमन्त्रीको हुने भएकाले सोहीअनुसार काम गर्ने उनको अठोट छ ।
००००
अर्थमन्त्री महतका लागि चुनौती धेरै भएपनि उनको काममा सफलता वा असmफलता निर्भर हुने निजी क्षेत्रको भनाइ छ । निजी क्षेत्रले नयाँ अर्थमन्त्रीले बजार चलायमान गराउन खेल्नुपर्ने अहम् भूमिका निर्वाह गर्नुपर्नेमा समेत जोड दिएको छ । 

नेपाल उद्योग वाणिज्य महासंघका अध्यक्ष शेखर गोल्छाले ब्याजदर घटाउने, तरलता बढाउने र अर्थतन्त्रलाई चलायमान बनाउन भूमिका खेल्नुपर्छ भन्ने नै निजी क्षेत्रको अपेक्षा रहेको बताए । उनले भने, ‘तरलता बढाउन सरकारले विकास खर्च पूर्ण क्षमतामा गर्नुपर्ने, अहिलेको समयमा वितरणमुखी सोचाइबाट बाहिर निस्किएर विकासमुखी हुनुपर्ने पहिलो आवश्यकता देखिन्छ ।’
००००
एसईई शुक्रवारदेखि शुरू भएको छ । यसवर्षका लागि परीक्षामा सहभागी हुन २०७८ मा कक्षा ९ मा ५ लाख १६ हजार ५९१ जनाले रजिस्ट्रेशन भरेका थिए । तर, एसईई दिनका लागि ४ लाख ८४ हजार २२७ जनाले फारम भरेका थिए । केही जिल्लामा सामान्य घटनाबाहेक पहिलो दिन देशभरको परीक्षा शान्त वातावरणमा सम्पन्न भएको परीक्षा नियन्त्रण कार्यालयले जनाएको छ ।
००००
सरकार र मिटरब्याजपीडित संघर्ष समितिबीच दोस्रो चरणको वार्ता शुक्रबार निष्कर्षविहीन बन्यो । शनिबार उनीहरुले प्रधानमन्त्रीलाई नै भेटेर आफ्नो माग सुनाउन लागेका छन् । तराईबाट १२ दिन हिँडेर आएर पीडितहरुले राजधानीमा आन्दोलन गरिरहेका छन् ।
००००
नेकपा एमालेका उपाध्यक्ष विष्णु पौडेलले पार्टीका नेता भीम रावलले एकपछि अर्को गल्ती गर्दै गइरहेको टिप्पणी गरेका छन् । रावल पार्टीको अनुशासनमा नबसेको र पार्टी सदस्यको कर्तव्य निर्वाह नगरेको पौडेलले बताए । 

प्रेस चौतारी नेपालले शुक्रवार कैलालीको धनगढीमा आयोजना गरेको पत्रकार सम्मेलनमा पौडेलले रावलले पार्टी अनुशासनको उल्लंघन गरिरहेको बताएका हुन् ।
००००
सरकारले आगामी वैशाख १ गतेदेखि वैदेशिक रोजगारीका लागि लिइने श्रम स्वीकृतिको आवेदन स्थानीय तहबाट गर्न सकिने व्यवस्था गरेको छ ।
अहिले नयाँ श्रम स्वीकृति र पुनः श्रम स्वीकृतिको काम अनलाइनबाट भइरहेको छ ।
००००

​नेपालले प्रधानमन्त्री कप त्रिदेशीय फुटबल प्रतियोगिताको उपाधि हात पारेको छ।  शुक्रबार दशरथ रंगशालामा भएको फाइनल खेलमा ८७ औं मिनेटमा मनिष डाँगीले निर्णायक गोल गरेसँगै नेपाल २–१ ले विजयी भएको हो ।