१२ साउन २०८३, मंगलबार
नेपाली कांग्रेसका सांसद रामहरि खतिवडाले पहाडी भेगमा जनतालाई सास्ती दिइरहेका बाँदरलाई चीनतिर निकासी गर्न सरकारलाई सुझाव दिएका छन् ।
आइतवार बसेको प्रतिनिधि सभा बैठकको शून्य समयमा सांसद खतिवडाले श्रीलंकाको उदाहरण दिँदै केही बाँदर चीनतिर पठाउन आग्रह गरेका हुन् ।
‘भर्खरै पनि चर्चा चल्यो, देशमा बाँदर आतंक छ, मैले एउटा समाचार पढेको थिए । श्रीलंकाले बाँदर चीन निकासी गरेर बेचेछ । आर्थिक संकट परिरहेको छ, केही बाँदर चीन लैजाने व्यवस्था गरियोस् । कि मार्ने अनुमति दिइयोस्,’ खतिवडाले भने ।
त्यसअघि शून्य समयमै माओवादी सांसद रामकुमार राईले बाँदरको व्यवस्थापन गर्न या किसानलाई क्षतिपूर्ति दिन सरकारको ध्यानाकर्षण गराएका थिए ।
‘पहाडी जिल्लामा बाँदरको कारणले जनताको उठिबास भइरहेको छ । बसाईंसराई भइरहेको छ । किसानको धनको क्षति भइरहेको छ । जनताको सम्पत्तिको रक्षाका लागि बाँदरको व्यवस्था गरियोस्, गर्न नसके जनतालाई क्षतिपूर्ति दिइयोस्,’ राईले भने ।
