इरानको कडा इस्लामिक ड्रेस कोडअन्तर्गत महिलाले हिजाब लगाउनुपर्ने कानूनकोसम्मान नगरेको भन्दै इरानी प्रहरीले आइतबार २४ घण्टामा १५० भन्दा बढी व्यवसाय बन्द गरेको जनाएको छ ।

प्रहरीले अब निगरानी क्यामेरा र अनुहार चिन्ने प्रविधिको प्रयोग गरेर कानून उल्लङ्घन गर्ने महिलाहरूलाई नयाँ निगरानी योजना लागू गरेको बताएको एक दिनपछि बन्दको घोषणा गरिएको थियो ।

सन् १९७९ को इस्लामी क्रान्तिको केही समयपछि नै महिलाहरूले सार्वजनिक स्थलमा हिजाब लगाउनुपर्ने प्रावधानलाई कानुनमा समावेश गरिएको थियो ।

“दुर्भाग्यवश, ड्रेस कोडमा यसअघिको चेतावनीलाई ध्यान नदिएको भन्दै प्रहरीले १३७ पसल, १८ रेस्टुरेन्ट र रिसेप्सन क्षेत्र बन्द गर्नुपरेको छ,” प्रहरी प्रवक्ता सइद मोन्टाजेरोल्माहदीलाई उद्धृत गर्दै तस्निम समाचार एजेन्सीले जनाएको छ ।

गत वर्ष कुर्दिश–इरानी २२ वर्षीया महसा अमिनीको हिरासतमा मृत्यु भएपछि सुरु भएको विरोध प्रदर्शनपछि संहिता उल्लङ्घन गर्ने महिलाको सङ्ख्या बढेपछि उक्त कारबाही गरिएको हो ।