बलियो टोली ओमानविरुद्ध नेपाली ब्याटरहरूले  संघर्ष गरिरहेका बेला युवा ब्याटर कुशल मल्लले आक्रामक अर्धशतक प्रहार गरेका छन् ।

नेपाली पारीलाई संकटबाट माथि उतार्ने प्रयासस्वरूप मल्लले ३० बलमा ५० रनको आँकडा पार गरेका हुन् ।​ 

यसक्रममा उनले ४ छक्का र ६ चौका प्रहार गरे ।

यसअघि भीम सार्की ३३ रन बनाएर आउट भएका थिए । ५६ बल खेलेका उनले ४ चौका र १ छक्का प्रहार गरे ।

कप्तान रोहित पौडेल २३ रन बनाएर आउट भए । त्यसक्रममा  ३४ बल खेलेका रोहितले २ चौका प्रहार गरे ।

कीर्तिपुरस्थित त्रिवि मैदानमा टस हारेर पहिले ब्याटिङ गरेको नेपालले रनको खाता नखोल्दै दुवै ओपनरलाई गुमाएको थियो ।

कुशल भुर्तेल ८ बल खेलेर खाता नखोली आउट हुँदा १० बल खेलेका आसिफ शेखले पनि रन जोड्न सकेनन् ।

यो समाचार तयार पार्दा ३० ओभरको समाप्तिमा ४ विकेट गुमाएर १४२ रन जोडेको छ ।

खेललाई आईसीसीले एक दिवसीय मान्यता समेत दिएको छ ।

यसअघि भएको आफ्नो पहिलो खेलमा नेपालले मलेसियालाई पराजित गरेको थियो । ओमान पनि आफ्नो पहिलो खेलमा विजयी भएको थियो ।

प्रतियोगितामा सहभागी १० टीमलाई दुई समूहमा विभाजन गरिएको छ ।

प्रतियोगिताको विजेताले भारत र पाकिस्तानको समूहमा रहेर एसिया कप खेल्नेछ ।