जोर्डनमा आयोजना हुने एएफसी यु–१७ महिला एसियन कप छनोटमा सहभागि हुने नेपाली महिला टोलीलाई आइतवार बिदाई गरिएको छ । 

अखिल नेपाल फुटबल संघ (एन्फा)ले आइतवार एक कार्यत्रमको आयोजना गरेर छनोट खेल्न जान लागेको टोलीलाई बिदाई गरेको हो । टोलीलाई एन्फाका पूर्व अध्यक्ष नरेन्द्र श्रेष्ठ, अध्यक्ष पंकज विक्रम नेम्वाङ, उपाध्यक्ष दावा लामा, महासचिव किरण राई लगायतले बिदाई गरेका थिए । अप्रिल २६ देखि ३० तारिख सम्म जोर्डनमा आयोजना हुने छनोट प्रतियोगितामा नेपाल समूह एचमा रहेको छ । नेपाल सम्मिलित समूहमा आयोजक जोर्डन र बलियो इरान रहेका छन् ।

छनोट अन्तर्गत नेपालले पहिलो खेल प्रिन्स मोहम्मद स्टेडियममा अप्रिल २६ मा इरानसँग खेल्दै प्रतियोगिताको सुरुआत गर्नेछ । दोस्रो खेल अप्रिल २८ मा आयोजक जोर्डनसँग प्रतिस्पर्धा गर्नेछ ।  एसियाली राष्ट्रहरुलाई ८ समूहमा विभाजन गरी आयोजना गरिएको छनोटबाट शीर्ष टोली दोस्रो चरणमा प्रवेश गर्ने मौका पाउनेछन् ।