सन् २०२२ मा संसारको सैन्य खर्च अहिलेसम्मकै सबभन्दा धेरै पुगेको पाइएको छ । 

स्विडनको राजधानी स्टकहोममा रहेको संस्था स्टकहोम इन्टरनेशनल पीस रिसर्च इन्स्टिच्युट (सिप्री) को ताजा प्रतिवेदनअनुसार, युक्रेन युद्धका कारण युरोपभरि सेनामा अत्यधिक खर्च बढेको छ । सन् २०२२ मा संसारमा २०.२४ खर्ब डलर सेनामा खर्च गरिएको छ र त्यो अहिलेसम्मकै कीर्तिमान हो । लगातार आठ वर्षदेखि संसारभरि सैन्य खर्च बढिरहेको छ । 

अझ युरोपमा त यो १३ प्रतिशतसम्म बढेको छ । विगत ३० वर्षमा यो वृद्धि सबभन्दा धेरै हो । 

रुस–युक्रेन द्वन्द्वका कारण संसारका अन्य देशले पनि सैन्य खर्च बढाएका छन् । निकट भविष्यमा यसमा सुधार आउने देखिएको छैन । 

सेनामा सबभन्दा बढी खर्च गर्ने मुलुक अमेरिका हो । सन् २०२२ मा अमेरिकाको रक्षा बजेट ८७७ अर्ब डलर थियो । त्यो संसारमा हुने कुल सैन्य खर्चको ३९ प्रतिशत हो । अमेरिकाले सन् २०२२ मा मात्र युक्रेनलाई लगभग २० अर्ब डलर बराबरको सैन्य सहायता दिएको छ । 

सेनामा सर्वाधिक खर्च गर्ने मुलुकको सूचीमा चीन दोस्रो स्थानमा छ । सन् २०२२ मा चीनको सैन्य बजेट २९२ अर्ब डलर थियो । उसले लगातार सैन्य बजेट बढाइरहेको छ । 

त्यसपछि भारत, जापान र साउदी अरब आउँछन् ।