०७ असार २०८३, आइतबार
वैदेशिक रोजगारीको लागि कतारमा पठाइदिन्छु भन्दै ६९ लाख रुपैयाँ ठगी गरेको आरोपमा एक जना पक्राउ परेका छन् ।
पक्राउ पर्नेमा ताप्लेजुङ आठराई त्रिवेणी गाउँपालिका ४ घर भई हाल काठमाडौं महानगरपालिका १० थापागाउँ बस्ने ४९ वर्षीय रुद्रबहादुर लिम्बू रहेका छन् । उनलाई काठमाडौं उपत्यका अपराध अनुसन्धान कार्यालयबाट खटिएको प्रहरीको टोलीले पक्राउ गरेको हो ।
प्रहरीका अनुसार उनले कतार पुलिसको जागिरको लागि कतार पठाइदिन्छु भन्दै विभिन्न व्यक्तिहरूबाट रकम ठगी गरेका थिए । उनले प्रतिव्यक्ति सात लाख रुपैयाँसम्म उठाएको प्रहरीले जनाएको छ ।
पक्राउ परेका लिम्बूले १ लाख भन्दा बढी तलव हुने विश्वास दिलाई, प्रलोभनमा पारी उनीहरूबाट पटक–पटक गरी ६९ लाख रूपैयाँ लिएका थिए । रकम उठाएर उनी सम्पर्कविहीन बनेका थिए ।
उनलाई धुम्बराहीबाट पक्राउ गरी थप अनुसन्धान तथा कारवाहीको लागि वैदेशिक रोजगार विभाग बुद्धनगर पठाइएको काठमाडौं उपत्यका अपराध अनुसन्धान कार्यालयले जनाएको छ ।
