शिक्षा, विज्ञान तथा प्रविधि मन्त्रालयअन्तर्गतको वैदेशिक अध्ययन अनुमति शाखा (एनओसी) ले विद्युतीय प्रणालीबाट वैदेशिक अध्ययन स्वीकृति पत्र (नो अब्जेक्सन सर्टिफिकेट) लिनसक्ने व्यवस्थाको शुआवात गरेको छ । सोमवारदेखि एनओसी कार्यालयले विद्युतीय प्रणालीको प्रयोगगरी वैदेशिक अध्ययन स्वीकृति पत्र लिनसक्ने व्यवस्थाको शुआवात गरेको हो । 

आजबाट लागू हुनेगरी शाखाले विद्युतीय प्रणालीको प्रयोग गरी वैदेशिक अध्ययन स्वीकृति पत्र डाउनलोड गर्न सक्नेगरी सेवा प्रवाहलाई फेसलेस, पेपरलेस र क्यासलेस बनाएको हो । 

अनलाइन सेवा शुरुआत गर्ने कार्यक्रममा शिक्षा, विज्ञान तथा प्रविधिमन्त्री अशोककुमार राईले नो अब्जेक्सन लेटर चाहने विद्यार्थीले अभिभावक गुहार्नु नपर्ने र घरमै बसेर फर्म भर्न सक्ने बताए । उनले आफैँले सर्टिफिकेट प्रिन्ट आउट गर्नसक्ने व्यवस्था शुरू हुनु प्रशंसनीय भएको बताए । 

अब विद्यार्थीहरूले घरबाटै एनओसी फर्ममा लाग्ने शुल्क पनि तिर्नसक्ने व्यवस्था गरिएको उनले बताए । 

त्यस्तै शिक्षा सचिव रामकृष्ण सुवेदीले आजबाट  फेसलेस, पेपरलेस र क्यासलेसको शुआवात हुनु नेपालीहरूका लागि खुसीको कुरा भएको बताए । नेपाललाई अब फेसलेस, पेपरलेस र क्यासलेस बनाउनुपर्छ भन्ने अभियानमा आफू लागेको उनले बताए । 

वैदेशिक अध्ययन स्वीकृतिसम्बन्धी निर्देशिका, २०७९ को दफा ७ को उपदफा (३) र (४) मा सेवाग्राहीलाई विद्युतीय प्रणालीको प्रयोगगरी आफ्नो वैदेशिक अध्ययन स्वीकृति पत्र डाउलोड गर्न सक्नेगरी सेवा प्रवाहलाई फेसलेस, क्यासलेस र पेपरलेस बनाउनुपर्ने व्यवस्था छ ।