२४ जेठ २०८३, आइतबार
नेपाली कांग्रेसमा युवा नेताहरूले पार्टी रूपान्तरण अभियान शुरू गरेका छन् । नेताहरू गुरु घिमिरे, डा. गोविन्दराज पोखरेल, मधु आचार्य, रञ्जित कर्ण, भुपेन्द्रजंग शाहीसहितको टिमले आज (सोमवार)देखि अभियान शुरू गरेको हो ।
नेता गुरु घिमिरेले रुपन्देहीको भैरहवाबाट रूपान्तरणको अभियान प्रारम्भ भएको जानकारी दिए । ‘रुपन्देही जिल्लाको भैरहवाबाट रूपान्तरण अभियान प्रारम्भ, साथीहरूको उत्साहजनक सहभागिता छ,’ उनले सामाजिक सञ्जालमा लेखेका छन् ।
पार्टी सुधारको अभियान सात प्रदेश र ७७ वटै जिल्लामा पुर्याउने उनीहरूको घोषणा छ ।
‘राजनीतिमा जटिलता थपिँदै गएका छन् । कांग्रेस मुलुकको राजनीतिक परिस्थितिलाई गम्भीतापूर्वक विश्लेषण गर्ने र गतिविधि गर्नेतर्फ अग्रसर भएन । जरैदेखि पार्टी सुधार गर्न सकिएन’ गुरुले भने, ‘ परिवर्तन गर्न सकिएन । त्यसैले समयसापेक्ष सुधारका लागि पार्टी संरचना र संगठनको शैली बदल्न दबाब दिने उद्देश्यले जनतासँग सार्थक संवादका नाममा हामीले रूपान्तरण अभियान शुरू गर्न लागेका हौं ।’
पहिलो चरणमा सातवटै प्रदेशमा प्रतिनिधि खटाउने र त्यसपछि ७७ वटै जिल्लामा पनि रूपान्तरणको बैठक, भेला, संवादसहितका कार्यक्रम गर्ने उनीहरूको तयारी छ ।
