पुष्पलाल मध्यपहाडी लोकमार्गको उद्गमविन्दु पाँचथरको याङवरक गाउँपालिका–१ चिवाभञ्ज्याङ सीमानाका खोल्न स्थानीयले माग गरेका छन् ।

प्रधानमन्त्री पुष्पकमल दाहाल ‘प्रचण्ड’को भारत भ्रमणका अवसरमा यसबारे भारतीय पक्षसँग छलफल गर्न माग गरिएको हो । 

नाका खोल्न माग गर्दै याङवरक गाउँपालिकाले प्रधानमन्त्री तथा मन्त्रिपरिषद्को कार्यालयलाई पत्र पठाएको छ । नाका सञ्चालनमा नआउँदा नेपाल–भारत (सिक्किम) आवतजावत गर्न समस्या भएको गाउँपालिकाका अध्यक्ष भीमबहादुर योङ्याले बताए ।

स्थानीय उत्पादन भारत निकासी रोकिएको, चिवाभञ्ज्याङ हुँदै नेपाल आउन चाहने पर्यटक र तीर्थयात्रीले बाटो प्रयोग गर्न नपाएकाले यथाशीघ्र नाका सञ्चालनको व्यवस्था गर्न माग गरिएको उनले बताए ।

नेपालले चिवाभञ्ज्याङमा १ दशकअघि नै सडक पुर्‍याएको थियो । मध्यपहाडी लोकमार्गको ट्रयाक खोलिएसँगै यहासम्म सवारीसाधन पुग्न थालेका थिए । २ वर्षअघि भारतको सिक्किम राज्य सरकारले पनि चिवाभञ्ज्याङसम्म सडक विस्तार गरेको छ । अहिले सिक्किमबाट नियमितजसो पर्यटक चिवाभञ्ज्याङ आउन थालेका छन् तर सीमानाका नभएका कारण सिक्किमबाट चिवाभञ्ज्याङ हुँदै सीमावर्ती क्षेत्र, नेपालका विभिन्न पर्यटकीय तथा धार्मिकस्थलसम्म जान चाहने पर्यटकले यो बाटो प्रयोग गर्न पाएका छैनन् ।

‘विशेषतः सिक्किमबाट पाथीभरा मन्दिरको दर्शन गर्न र पूर्वी पहाडका विभिन्न स्थानमा रहेका आफन्त भेट्न जान चाहने भारतीयले बाटो प्रयोग गर्न पाएका छैनन्,’ याङवरक–१ का वडाध्यक्ष राजेन्द्र खालिङले भने, ‘यहाँबाट सिक्किम जान चाहनेले पनि बाटो प्रयोग गर्न पाएका छैनन् ।’

पाँचथर र ताप्लेजुङका हजारौं परिवारको सिक्किमसँग पारिवारिक सम्बन्ध छ । अहिले पनि वारिपारि बिहेवारी हुने गरेको छ । प्रहरीको पास बोकेर आफन्त भेट्नुपर्ने स्थानीयको बाध्यता छ भने सरसामान ल्याउन तथा लैजान उत्तिकै कठिन छ । चिवाभञ्ज्याङको सीमा क्षेत्रमा सिक्किम भारतमा गाभिएसँगै सीमा सुरक्षा बल तैनाथ छ भने नेपालका तर्फबाट ३ वर्षअघि बोर्डर आउट पोस्ट (बीओपी) स्थापना भएको छ । सुरक्षा व्यवस्था भइसकेको अवस्थामा नाका स्थापना सहज रहेको गाउँपालिका अध्यक्ष भीमबहादुर योङ्या (सुवास) को भनाइ छ ।