निर्वाचन आयोगले निर्वाचन कार्यालय खारेजीलगायतको विषयमा छलफल गर्न राजनीतिक दलहरूलाई बोलाएको छ ।

शुक्रवार बिहान साढे ११ बजे बैठक बस्नेगरी राजनीतिक दलहरूलाई बोलाइएको आयोगका प्रवक्ता एवं सहसचिव शालिग्राम शर्मा पौडेलले जानकारी दिए ।

उनका अनुसार  राजनीतिक दलहरूसँगको बैठकमा विभिन्न पाँच विषयमा छलफल हुनेछ । निर्वाचन कार्यालयको खारेजी, निर्वाचन कानूनको विधेयक, स्थानीय तहसँगको सहकार्यमा मतदाता नामावली संकलन, विदेशमा रहेका नेपाली नागरिकको मतदाता नामावली संकलन र दलको लेखा तथा लेखापरीक्षण लगायतका विषयमा छलफल हुने प्रवक्ता पौडेलले जानकारी दिए ।

सरकारले जिल्लास्थित निर्वाचन कार्यालयहरू खारेजी गर्ने नीति लिएको छ । सरकारको सो नीतिबारे आयोगले प्रेस विज्ञप्ति नै जारी गरेर सञ्चालनमा रहेका संरचनाहरूको खारेजी गर्ने निर्णयले संवैधानिक निकायको स्वतन्त्रता, स्वायत्तता र समक्षतामा गम्भीर प्रश्न उठ्न सक्ने अवस्था भएको बताएको थियो ।

यस विषयमा आयोगले उपप्रधान एवं गृहमन्त्री नारायणकाजी श्रेष्ठसँग छलफल गरिसकेको छ । गृहमन्त्री श्रेष्ठले यस विषयमा अर्थमन्त्री महतसँग छलफल गरेर आवश्यक निर्णय गर्ने बताएका थिए ।