०३ साउन २०८३, आइतबार
अखिल नेपाल फूटबल संघ (एन्फा) ले भारतमा आयोजना हुने १४औं संस्करणको पुरुष साफ च्याम्पियनसीपका लागि बिहीवार नेपाली राष्ट्रिय फूटबल टोलीको घोषणा गरेको छ ।
आगामी असार ६ गतेदेखि सञ्चालन हुने प्रतियोगिताका लागि नेपाली राष्ट्रिय फूटबल टोलीका मुख्य प्रशिक्षक भिन्सेन्जो अल्बर्टो एनेसले २३ सदस्यीय नेपाली टोलीको घोषणा गरेका हुन् ।
छनोट हुने नेपाली टोलीको गोलकिपरमा किरण चेम्जोङ, दीप कार्की र विशाल श्रेष्ठ रहेका छन् । डिफेन्डरमा विमल पाण्डे, सनिस श्रेष्ठ, अनन्त तामाङ, देवेन्द्र तामाङ, निशान्त खड्का, रोहित चन्द र सिमान्त थापा रहेका छन् ।
मिडफिल्डरमा पुजन उपरकोटी, एरिक विष्ट, नवीन लामा, मनिकुमार लामा र लाकेन लिम्बू रहेका छन् ।
फरवार्डमा आयुस घलान, नवयुग श्रेष्ठ, दीपकराजसिंह ठकुरी, अन्जन विष्ट, मनिष डाँगी, आषिश चौधरी र विमल घर्तीमगर रहेका छन् । प्रतियोगितामा सहभागी ८ राष्ट्रलाई २ समूहमा विभाजन गरिएको छ । नेपाल समूह ‘ए’मा परेको छ ।
नेपालको समूहमा कुवेत, भारत र पाकिस्तान रहेका छन् । समूह ‘बी’मा लेबनान, माल्दिभ्स, भूटान र बंगलादेश रहेका छन् ।
नेपालले आफ्नो पहिलो खेल आगामी ६ असार गते कुवेतसँग खेल्नेछ भने असार ९ गते आयोजक भारत र असार १२ गते पाकिस्तानसँग खेल्नेछ ।
