०७ असार २०८३, आइतबार
काठमाडौं महानगरपालिकाका प्रमुख बालेन्द्र शाह (बालेन) ले ‘आदिपुरुष’को विवादित अंश नहटाएसम्म भारतीय चलचित्र प्रदर्शनमा रोक लगाउन सरकारलाई आग्रह गरेका छन् ।
शुक्रवार सञ्चार तथा सूचना प्रविधि मन्त्रालयलाई पत्र लेख्दै मेयर बालेनले दक्षिण भारतीय चलचित्र ‘आदिपुरुष’मा राखिएको आपत्तिजनक अंश हटाउन पहल गर्न अनुरोध गरेका हुन् ।
चलचित्रमा समावेश भएको ‘जानकी भारतीय छोरी हुन्’ भन्ने आपत्तिजनक सन्देश उक्त चलचित्रको मूल भागबाट हटाउनुपर्ने उनको आग्रह छ ।
पत्रमा भनिएको छ, ‘नेपालको स्वतन्त्रता, स्वाधीनता र स्वाभिमानलाई अक्षुण्ण राखी राष्ट्रहितको रक्षा गर्नु प्रत्येक सरकार, सरकारी निकाय, गैरसरकारी क्षेत्र र नेपाली नागरिकको पहिलो कर्तव्य हुने कुरामा कुनै सन्देह छैन ।’
कानूनी प्रबन्धको विषय उल्लेख गर्दै प्रमुख शाहले पत्रमा भनेका छन्, ‘नेपालको संविधानको धारा ५ र ५६ को उपधारा ९६० ले संघ, प्रदेश र स्थानीय सरकारलाई राष्ट्रिय हितको सरक्षण गर्ने जिम्मेवारी तोकेको छ । उक्त चलचित्र यथावत प्रदर्शन भएमा नेपालको राष्ट्रियता, सांस्कृतिक एकता र राष्ट्रिय विभुती माथि ठाडो प्रहार भई अपूरणीय क्षति हुने देखिन्छ । उक्त चलचित्रबाट नेपाल माथि सांस्कृतिक अतिक्रमण भएको हुँदा महानगरपालिकाको गम्भीर ध्यानाकर्षण भएको छ ।’
राष्ट्रहितविपरीतको उक्त चलचित्रको काठमाडौं महानगरपालिका क्षेत्रभित्र मात्र प्रदर्शनमा निषेध गरेर देशभित्रका अन्य क्षेत्र र विदेशमा प्रदर्शन हुन दिने हो भने त्यसले भ्रामक तथ्य स्थापित गर्छ । पत्रमा भनिएको छ, यसकारण नेपाल सरकारलाई छिमेकी मित्र राष्ट्र भारतसँग कुटनीतिक पहल गरी उक्त चलचित्रको आपत्तिजनक अश हटाउने व्यवस्था मिलाउन अनुरोध गरिन्छ । साथै, उक्त चलचित्रबाट आपत्तिजनक अंश नहटाएसम्म नेपालमा कुनै पनि भारतीय चलचित्र प्रदर्शन गर्न निषेध गर्ने गराउने व्यवस्था गर्न समेत अनुरोध गरिन्छ ।
पत्रको वोधार्थ/कार्यार्थ प्रधानमन्त्री तथा मन्त्री परिषदको कार्यालय, परराष्ट्र मन्त्रालय र चलचित्र विकास वोर्डलाई दिइएको छ ।
