नवौं संस्करणको सिन्धुकप फूटबल प्रतियोगिता २०८० को उपाधि भगवती क्लब टोखाले जितेको छ ।

लामोसाँघुस्थित वसन्तपुर खेल मैदानमा शनिवार सम्पन्न भएको फाइनल खेलमा भगवतीले काभ्रे जिल्ला फूटबल संघलाई पेनाल्टी सुटआउटमा ४–२ गोलअन्तरले हराउँदै उपाधि जितेको हो ।

निधारित समय १–१ गोलको बराबरीमा सकिएपछि खेल सिधैं पेनाल्टीमा धकेलिएको थियो । पहिलो हाफको खेलमा शुरूआती अग्रता बनाएको काभ्रेले दोस्रो हाफमा गोल खाएको थियो ।

गत जेठ २८ गतेबाट शुरू भएको प्रतियोगिताको समापन सहारोहमा स्वास्थ्य तथा जनसंख्यामन्त्री मोहनबहादुर बस्नेत, अखिल नेपाल फूटबल संघ एन्फाका अध्यक्ष पंकजविक्रम नेम्वाङ, एन्फाकै वरिष्ठ उपाध्यक्ष बीरबहादुर खड्का लगायतले पुरस्कार प्रदान गरे ।

युथ स्पोर्ट्स क्लबको आयोजना र सिन्धुपाल्चोक जिल्ला फूटबल संघको प्राविधिक सहयोग रहेको सिन्धुकपको विजेता भगवतीले नगद २ लाख र उपविजेता काभ्रेले नगद १ लाख पाएको छ ।