२८ जेठ २०८३, बिहीबार
उत्तर कोरियाले आगामी डेढ वर्षभित्र थप हाइड्रेजन बम बनाउने विज्ञहरूले आशंका गरेका छन् । यो आणविक हतियारले एकैचोटिमा लाखौं मानिस मार्न सक्छ ।
अमेरिकाको रक्षा मन्त्रालयका एक अधिकारीले नाम नबताउने शर्तमा बताएअनुसार उत्तर कोरियालीहरू हाइड्रोजन बम बनाउने अन्तिम चरणमा पुगेको र डेढ वर्षभित्रमा बनाइसक्ने बताएका छन् । यो बम अमेरिकाले जापानी शहरहरू हिरोशिमा र नागासाकीमा खसाएको भन्दा बढी शक्तिशाली हुनेछ ।
उत्तर कोरियाका सर्वोच्च नेता किम जोङ–उनले गत वर्ष हाइड्रोजन बम परीक्षण गरेको दाबी गरेका थिए तर अधिकांश विज्ञहरूले यो दाबीलाई खारेज गरेका थिए । तर दक्षिण कोरियाले चाहिँ उत्तर हाइड्रोजन बम बनाउन एक चरण मात्र बाँकी रहेको बताएको थियो ।
उत्तरले हाइड्रोजन बम बनायो र अमेरिकामा खसायो भने लगभग पाँच लाख मानिसको मृत्यु हुने र अरू नौ लाख घाइते हुने सम्भावना रहन्छ ।
उत्तरले अघिल्लो शुक्रवार अन्तर्महादेशीय ब्यालिस्टिक क्षेप्यास्त्रको परीक्षण गरेर अमेरिकामा प्रहार गर्नसक्ने सम्भावना देखाइसकेको छ ।
एजेन्सी
