०९ साउन २०८३, शनिबार
कोशी प्रदेश सरकारका मुख्यमन्त्री हिक्मत कार्कीले बिहीवार विश्वासको मतका लागि प्रदेशसभामा प्रस्ताव लैजाँदैछन् ।
दिउँसो १ बजे बस्ने बैठकमा मुख्यमन्त्रीले विश्वासको मत लिनेगरी संसद् सचिवालयले कार्यसूची निकालेको छ ।
मुख्यमन्त्री कार्कीलाई अहिलेकै अवस्थामा १ मतको आवश्यकता पर्छ । जसपाको १ सीट रहेकाले कार्की सकेसम्म उसकै समर्थन लिने प्रयासमा छन् ।
मधेश प्रदेशमा एमालेले जसपाको सरकारलाई विश्वासको मत दिएकाले कोशी प्रदेशमा पनि जसपाले सघाउने एमालेको विश्वास छ ।
जसपाका अध्यक्ष उपेन्द्र यादवले निर्णय गर्ने अधिकार प्रदेशलाई दिएको बताए ।
यता जसपाका कोशी प्रदेश अध्यक्ष दीपक याख्याले अहिले तटस्थ बस्ने बताए ।
कांग्रेस र माओवादीले कोशी नाम राख्न हस्ताक्षर गरेकाले उनीहरूलाई पनि अहिले नै समर्थन दिने अवस्था नरहेको उनको भनाइ छ ।
जसपाको साथ नपाएको अवस्थामा अन्य विपक्षी दलको कुनै एक सांसदलाई फ्लोर क्रश गराउन सके मात्र एमाले नेतृत्वको सरकार जोगिने छ ।
प्रदेश सभामा बहुमतका लागि ४७ सांसदको समर्थन आवश्यक पर्छ । एमालेका ४० र राप्रपाका ६ गरी ४६ सांसदको समर्थन मुख्यमन्त्री कार्कीलाई छ ।
विपक्षमा कांग्रेसका २९, माओवादीका सभामुखसहित १३ र नेकपा एसका ४ सांसद छन् ।
