केन्द्रीय कारागार जगन्नाथदेवल मातहत ‘सेन्ट्रल जेल’बाट भद्र बन्दीगृह सारिएका ३ जनामध्ये २ जनालाई भीमफेदी कारागार सरुवा गरिएको छ ।

सेन्टर जेल व्यवस्थापनले पछिल्लो समयमा जेलभित्रका गतिविधिको सूचना चुहिएको र उनीहरूको गतिविधि शंकास्पद् देखिएको भन्दै असार ५ गते ३ जनालाई भद्र बन्दीगृह सारेको थियो ।

मानव बेचबिखनको अभियोगमा जेल परेका मूल सहायक नहकुल तामाङ, लागूऔषधमा जेल परेका बिजुली नाइके शेरबहादुर बस्नेत र अपहरण मुद्दामा जेल परेका लाइब्रेरी सहायक विष्णु पाण्डेलाई भद्र बन्दीगृह सारिएकोमा अहिले तामाङ र बस्नेतलाई भीमफेदी सरुवा गरिएको स्रोतले लोकान्तरलाई बतायो ।

पछिल्लो समयमा केन्द्रीय कारागारमा विभिन्न स्वार्थ समूहको सक्रियता देखिएको छ । जेलभित्र रहेका समीरमान बस्नेत र जेलबाहिर रहेका गुण्डा नाइके रमेश बाहुनबीच द्वन्द्व देखिएको स्रोतको दाबी छ । 

असार मसान्तमा जेलमा भएका नाइके, चौकीदार, मुल नाइके, दाइ नाइके, भाइ नाइकेलगायतका व्यक्तिहरू परिवर्तन हुने समय भएकाले विभिन्न समूहहरू सक्रिय हुने गरेका छन् ।

अहिले केन्द्रीय कारागारमा चौकीदारका रूपमा प्रभाकर नरसिंह राणा छन् । 

उनलाई हटाएर आफूनानिकट नहकुल तामाङलाई चौकीदार बनाउन एउटा समूह सक्रिय थियो, तर त्यसलाई तोड्न सक्रिय समूहले अहिले प्रोपागाण्डा गरिरहेको जेल प्रशासनको आरोप छ ।

राणा गत फागुनमा चौकीदार नियुक्त भएका थिए । उनको कार्यावधि १ वर्ष अर्थात आगामी फागुनसम्म रहन्छ । केन्द्रीय कारागारमा अहिले ३७ सयको हाराहारीमा कैदीबन्दी छन् ।

उनीहरूलाई आवश्यक पर्ने लत्ताकपडालगायतका दैनिक उपभोग्य सामग्रीहरूको ठूलो व्यापार हुने गरेको छ । त्यो व्यापार आफ्नो पक्षमा पार्नका लागि विभिन्न समूह सक्रिय हुने गरेका छन् ।