२३ जेठ २०८३, शनिबार
काठमाडौं, २६ भदौ — अमेरिकाको फ्लोरिडा राज्यमा इर्मा आँधीले विनाश मच्चाइरहेको छ । मायामी शहरलाई चपेटामा पारेपछि आँधीले तटीय इलाकामा खतरनाक बाढी ल्याएको छ ।
अहिले यो आँधीको तीव्रतालाई क्याटेगोरी १ मा घटाइएको भएपनि यो १३७ किलोमिटर प्रतिघन्टाको गतिमा अघि बढिरहेको छ ।
राज्यमा रहेको ३४ लाखभन्दा बढी घरको बिजुली काटिएको छ र मायामीका धेरै भागहरू पानीमुनि छन् ।
आँधीका कारण तीनजनाको मृत्यु भएको खबर छ र धेरै क्षेत्रहरूमा कर्फ्यु लगाइएको छ ।
इर्माले क्यारिबियन क्षेत्रको १० वटा देशमा तबाही मच्चाउँदै कम्तीमा २८ जनाको ज्यान लिएको छ ।
राष्ट्रपति डोनल्ड ट्रम्पले यसलाई प्रमुख विपद् भनी घोषणा गरेका छन् र फ्लोरिडाका लागि संघीय सहायताको पनि घोषणा गरेका छन् ।
आँधी अहिले टाम्पा बे एरियातिर बढिरहेको छ र लगभग तीस लाख मानिस टाम्पामा बस्छन् । उक्त क्षेत्रमा सन् १९२१ देखि प्रमुख आँधी आएको छैन ।
आज सोमवारसम्ममा इर्मा कमजोर भएर जाने बताइएको छ ।
बीबीसीबाट
