०५ साउन २०८३, मंगलबार
जापानको फुकुओका शहरमा आयोजना हुने वर्ल्ड एक्वाटिक च्याम्पियनसिप २०२३ मा भाग लिन आज नेपाली टोली जापान प्रस्थान गर्दैछ ।
प्रतियोगितामा नेपालका ४ खेलाडीले सहभागिता जनाउने भएका छन् ।
सहभागी हुन जाने नेपाली टोलीलाई राष्ट्रिय खेलकुद परिषद् (राखेप) का सदस्य सचिव टंकलाल घिसिङले मंगलवार सफलताको शुभकामना दिँदै बिदाइ गरे । ओलम्पिकको छनोट प्रतियोगिता रहेको च्याम्पियनसिपमा गौरिका सिंह, एलेक्जेन्डर गादेगाद शाह, डुवाना लामा र नासिर याह्या हुसेनले प्रतिस्पर्धा गर्नेछन् ।
नेपाल पौडी संघका अध्यक्ष अशोक बज्राचार्यको नेतृत्वमा जापान जाने टोलीमा टीम प्रशिक्षकमा ओलम्पियन नयना शाक्य, टीम व्यवस्थापकमा नरेश बैद्य र अफिसियलमा सञ्जय शाह छन् ।
नेपाल पौडी संघका अध्यक्ष बज्राचार्यले साउन ७ देखि १३ गतेसम्म आयोजना हुने च्याम्पियनसिपका दौरान हुने वर्ल्ड एक्वाटिक कंग्रेसमा पनि सहभागिता जनाउनेछन् ।
च्याम्पियनसिपअन्तर्गत साउन ७ गते नासिरले ४०० मिटर फ्रिस्टायलमा प्रतिस्पर्धा गर्नेछन् भने साउन ८ गते गौरिकाले सय मिटर ब्याकस्ट्रोकमा प्रतिस्पर्धा गर्नेछिन् । सोही दिन नासिरले २०० मिटर फ्रिस्टायलमा प्रतिस्पर्धा गर्नेछन् । साउन ९ गते डुवानाले २०० मिटर फ्रिस्टायलमा प्रतिस्पर्धा गर्नेछिन् भने १० गते गौरिकाले ५० मिटर ब्याक स्ट्रोक र एलेक्जेन्डरले १०० मिटर फ्रिस्टायलमा प्रतिस्पर्धा गर्नेछन् । ११ गते डुवानाले १०० मिटर फ्रिस्टायलमा र १२ गते एलेक्जेन्डरले ५० मिटर फ्रिस्टायलमा प्रतिस्पर्धा गर्नेछन् ।
