२४ जेठ २०८३, आइतबार
डिजिटल मिडिया तथा कम्युनिटी प्लाटफर्म विज्ञ सन्तोषकुमार देवकोटा स्पेस फोरके टेलिभिजनको अपरेशन निर्देशकमा नियुक्त भएका छन् । देवकोटालाई मिडियाका अध्यक्ष दिनेशकुमार शाहीले सोामवार अपरेशन निर्देशकमा नियुक्त गरेका हुन् ।
देवकोटालाई सोमवार नै अध्यक्ष शाहीले कार्यालयमा स्वागत गरेका छन् । देवकोटासँग छापा तथा रेडियोका साथै डिजिटल प्लाटफर्ममा एक दशकभन्दा बढी काम गरेको अनुभव छ ।
देवकोटाले यसअघि नेपाली पात्रोमा प्रमुख कार्यकारी अधिकृतका रूपमा काम गरेका थिए । उनले हाम्रो पात्रोका पूर्वसंस्थापक/एमडीको भूमिका निभाएका थिए । उनी नेपालको सर्वाधिक लोकप्रिय स्ट्याण्डअप कमेडी समूह ‘नेपग्याजम (NepGasm Comedy) का संस्थापक निर्देशकसमेत हुन् ।
२०५६ सालमा वीरगञ्जबाट प्रकाशित हुने सार्थक साप्ताहिकबाट सञ्चार क्षेत्रमा प्रवेश गरेका सन्तोष देवकोटा लामो समय रेडियो प्रसारणमा समेत आबद्ध भए । एक दशकयता भने उनी डिजिटल मिडिया विज्ञका रूपमा सक्रिय छन्।
टेलिभिजन मिडियाहरूको भीडमा एक वर्षअघि प्रसारण शुरू गरेको स्पेस फोरके टेलिभिजनले पछिल्लो समय व्यवस्थापन, समाचार तथा प्रोडक्शनमा दक्ष जनशक्ति नियुक्त गरिरहेको छ । स्पेस फोरकेले गत भदौ ८ गतेदेखि आफ्नो प्रसारण शुरू गरेको थियो ।
